भांगरभूंय | प्रतिनिधी
ए केकदां आपली मनरिजवण करपाक सकाळच्या पारार उठून सैमा वांगडा इश्टागत जोडपाक आपली भलायकी सुदारवपाक, एकलोच थारायनासतना चलत सुटप… खंय पावतलो हाचो चड विचार न करतां!!
भोंवडी करतना वाटेर, विंगड विंगड सभावाचे लोक मेळटात, रस्तो आडावन बशिल्लीं निश्पाप गोरवां दिसतात, आपल्या वीतभर पोटाची खळगी भरपाक सदांच फांतोडेर उठून हांगा थंय धांवपी पावकार, दुदकार, पेपरवाले आनी हेर लोक दिश्टी पडटात. वाटेर मेळपी हे लोक आमकां किदें ना किदें देख दिवन वतात.
तशेंच चलत रावप आनी मुखेल रस्त्या वेल्यान, एक आडवळणाची वाट पळोवप आनी त्या पांयवाटेन ना जाल्यार मातयेच्या तांबड्या रस्त्यान फुडे चलत रावप. ह्यो वाटो ना जाल्यार तांबडो रस्तो मातयाळो आसता, निसरडो आसता, कांट्या झिलिंनी भरिल्लो आसता, शेकरे पडिल्ले आसतात.
पूण सर्ग-सूख म्हणल्यार किदें आसता तें ह्या पांयवाटेर ना जाल्यार मातयेच्या रस्त्यार अणभवूंक मेळटा. ह्या मार्गार गर्दी आसना, धांवपळ आसना, जिखपा वा हारपाची सर्त आसना.
आसता ती निरव शांतताय, चवरिल्लीं झाडां-पेडां, चिमणी, शेंवण्यांचें चिवचिवणें, दोंगुल्ले वेल्यान व्हांवत येवपी नितळ अशा व्हाळाचें मधूर अशें संगीत, लांबचे लांब पातळिल्ली भाटां-बेसां, ताचे मदल्यान व्हांवपी व्हाळ, पाचवेचार रानांत चरपी गोरवां-पाडकां आनी तांकां राखपी ते काळे कुळकुळीत राखणे. म्हाका तर गोरवांचे हे राखणे
म्हणल्यार पांचव्याचार सैमाचे राखणदार कशे दिसतात. सैमाच्या निर्मात्यान सैमाची राखन करपा खातीर जल्मांक घातिल्ले जापसालदार.
वाटेर मेळपी मोर, रानवटी साेंशे, शिरवणांत आपली पाखां फुलोवन भुरकटल्ल्या सारखे नाचपी मोर, रानवटी जनावरां पसून आपले शेत-भाट राखून दवरपा खातीर, माचणांतल्यान कुकारे दिवपी शेतकामती आनी तुमचे नशीब बरें आसत जाल्यार, पंगडानी
भोंवपी आनी आंगा खांद्यान भरिल्ले गवे तुमकां ह्या वाठारांनी
हुनहुनीत येवकार दितात. एकदम भांगराळो अणभव. न विसरपा सारखे खीण.
हे भांगराळे खीण आमकां दिसाची बरी सुरवात करून दितात, आमचे जिणेंत फुडे वतना नवी उर्बा दितात. नव्या नव्या शिखरांचेर चडपाक बळगें दिता. जिणेंतल्या मार्गार नवे नवे मार्ग दोळ्या मुखार येतात.
जिंदगी का सफर , हैं यह कैसा सफर…
कोई समझा नहिं, कोई जाना नहिं….
कैसी हैं यह डगर, चलते हैं हम मगर…
कोई समझा नहिं, कोई जाना नहिं…
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.