मोदींचो पाकिस्तानाक खर संदेश

भांगरभूंय | प्रतिनिधी

प्र धानमंत्री नरेंद्र मोदी हांणी निमाणें पाकिस्तानाचेर तोंडसूघ घेतलेंच. आनी आयज ती खरी गरज अशिल्ली. संवसारीक तांकीचे संगणक वैज्ञानीक लेक्स फ्रीडमन हांचे कडेन सुमार तीन वरांचे एका पोस्टकार्डांत प्रधानमंत्री नरेंद्र मोदी हांणी पाकिस्तानाचेर अशें तोंडसूख घेतलें की मुखेल विरोधी पक्ष काँग्रेसी सयत सगल्यांचे दोळे बरें पैकीं उगडले आसतले. शांतताय प्रस्थापीत कपा खातीर भारता कडल्यान आतां मेरेन जाल्ल्या दरेक यत्नाची जाप पाकिस्तानान फक्त दुस्मानकाय आनी विस्वासघाताक कशी दिली हाचेर बोट दवरून पाकिस्तानाक तांची सुवात दाखोवन दिवपाचें काम प्रधानमंत्र्यांनी हे चर्चे वेळार केलें आनी ताका येवकार दिवंकूच जाय. सध्या पक्षा भितरल्या वैचारीक संघर्शांत खोलायेन फूट पडून आपल्या फुडाराचो हुस्को आशिल्ल्या काँग्रेस पक्षान अजून हाचेर प्रतिक्रिया उक्तावंक नासली तरी तांचो फुडारी राहूल गांधीन वा पक्षाच्या फुडाऱ्यान अजून ह्या विशयाचेर आपलीं मतां उक्तावंक नात, आतां ताका हे विशीं तोंड उगडचें पडटलें. मोनेपण घेवन रावल्यार अजूनय पांय खोलांत वचूंक शकतले हाचोय उगडास सगल्यांनी दवरचो पडटलो. पाकिस्तानांत सद्या कितें चल्लां हाचें भयल्या संवसाराक पूर्ण कल्पना आसा. अपहरणाचे बाबतींत आपलो हात कोणूच धरूंक शकचो ना ह्या भ्रमा खाला आशिल्ल्या पाकिस्तानाक बलुचिस्तानच्या विद्रोह्यांनी जाफर एक्सप्रेसीचें अपहरण करून जो धडो शिकयलो ताका लागून तांची संवसारांत नाचक्कीच जाली, आनी हेंवूय इतलेंच खरें की पाकिस्तानाची आनीक नाचक्की जावपा सारकें आतां कांयच उरिल्लें ना.
पाकिस्तानांतली पुरायपणान इबाडत चलिल्ली अर्थवेवस्था, तातूंतल्यान लोकां मदीं निर्माण जाल्लो असंतोष आनी राजकी अस्थिरताय, अराजकता हाका लागून आमचो शेजारी देश सामकोच त्रस्त जाल्लो आसतना प्रधानमंत्री नरेंद्र मोदी हांणी नेमको वेळ सादून पाकिस्तानाक हारसो दाखयलो हें बरें जालें. तें करतना भारतान दरेक फावटी शांतताय प्रस्थापीत करपा खातीर जे प्रामाणीकपणाक यत्न केले ताका सकारात्मक प्रतिसाद दिवपा बदला दुस्मानकाय वाडोवपाचेरूच कसो भर दिलो हाचेर उजवाड घालून मोदी हांणी एका फातरांत दोन शेंवणीं मारलीं अशेंच म्हणचें पडटलें. भारता सारक्या शेजारी देशा कडेन दुस्मानकाय दवरपाची आसत जाल्यार तें तांकां परवडपाचें ना असो खर संदेशूच प्रधानमंत्री नरेंद्र मोदी हांणी ह्या मुलाखतींतल्यान दिल्लो दिसता. मोदी हांच्या फुडारपणा खाला भारत आयज संवसारांतली एक महाशक्ती जावपाचे वाटेर आसतना शेजारच्या पाकिस्तानाची वागणूक कशी आसूंक जाय हाचो धडो तांकां ह्या मुलाखतींतल्यान मेळिल्लो आसुये अशें म्हणल्यार लेगीत ती अतिशयोक्तीपण थारची ना. पाकिस्तानान खरें म्हणल्यार आपणे स्विकारिल्लो पोरणो मार्ग सोडून थोडोसो काय जायना अशियांत शांतताय प्रस्थापीत करपा खातीर नव्या मार्गान वाटचाल करपाची गरज आसा हें संवसार आड्डी मारून सांगत आसतनाय थंयच्या फुडाऱ्याच्या नाका वेलो मूस लेगीत हालना हाका कितें म्हणप.
पाकिस्तानाची आयज आंतरराष्ट्रीय मळार सगली कडेन फजेत जायत आसा. तांच्या जाल्ल्या एकूण दुर्दशेंत चडूच भर पडत आसा. क्रिकेट हें एक अशें मळ आशिल्लें की थंय तांकां तकली वयर काडपाची संद अशिल्ली. पूण थंय लेगीत भारतान तांचें नाक कापलें. हालींच खेळिल्ल्या चॅम्पियन्स क्रिकेट सर्तींत पाकिस्तान येजमान देश आशिल्लो अशें आतां कोणेंय सांगत जाल्यार ताचेर कोणूच विस्वास दवरचो ना. चॅम्पियन्स क्रिकेट सर्तीच्या आयोजनांत देशाचे कोसळिल्ले अर्थवेवस्थेक थोडो आदार मेळटलो अशी आस्त थंयचे फुडारी बाळगून आशिल्ले. पूण भारतानूच तांची फजेत केली. पयलीं पाकिस्तानांत मॅची खेळपाक न्हयकार दिल्ल्यान तांची अवस्था बिकट जाली. जाल्यार उरिल्लें काम तांच्या खेळगड्यांनी केलें आनी आपलेंच नाक कापून घेतलें. येजमान पंगड हे सर्तींत फक्त दोन मॅची खेळ्ळो. न्युझिलॅण्डान पाकिस्तानाक तांच्या मैदानार हारयलो. जाल्यार रोहीत शर्माच्या पंगडान तांकां दुबयंत हारयलो. येजमान पाकिस्तानांतल्या लोकांक चॅम्पियन्स क्रिकेट सर्तीची फायनल मॅच निमाणें टीव्हीचेर पळोवची पडली, आनी तातूंतय दुर्दैव अशें की भारताचो रोहीत शर्मा चॅम्पियन्स करंड उबारताना पळोवपाची वेळ तांचेर आयली. पाकिस्तानाच्या दुर्दैवाचे फेरे अशे चालूच आसतना स्वतंत्र बलुचिस्तान मागणी करीत जाफर एक्सप्रेसीचें अपहरण करप्यांनी लेगीत पाकिस्तानाक तांची जाल्ली अवस्था दाखोवन दिली. हेच फाटभुंयेर प्रधानमंत्री नरेंद्र मोदी हांणी लेगीत पाकिस्तानाक तांचो हारसो दाखयिल्ल्यान ताची चर्चा जावप सभावीक आसा.
पाकिस्तानांतली आयची परिस्थिती जशी वयले वयर दिसता तशी अजिबात ना. पाकिस्तानी लोकांक राज्यकर्त्याच्या चुकांची जाणीव जावंक लागल्या आनी ताचें प्रत्यक्ष चित्र लेगीत खूबशे फावटी लोकांच्या आवाजांतल्यान प्रतिबिंबीत जातना संवसार पळयत आसा. अशे परिस्थितींत लेगीत पाकिस्तानी लश्कर आनी तांचे गुप्तहेर एजन्सीक भारता आडच्यो कारवायो थांबोवच्यो अशें दिसना अशें जे म्हणटात तें खरें आसा. पाकिस्तानाक आयज ताचेच मोल मेजचें पडटा हातूंत दुबाव ना. पाकिस्तानी लश्कर आसूं वा आतंकवाद्यांचे पोशिंदे आशिल्ल्या राज्यकर्त्यां कडल्यान जम्मू काश्मीरांत अजून लेगीत अशांतताय माजोवपाचो जो यत्न चल्ला ताचे कडेन भारत आडनदर करूंक शकना. पंजाबातूय पाकिस्ताना कडल्यान तेंच चलत आशिल्ल्यान पाकिस्ताना विशीं भारता कडल्यान मात लेगीत सहानुभुती दाखोवपाचो प्रस्न उप्रासना. अशा वेळार भारता कडेन खंयच्याय मळार मुकाबलो करप पाकिस्ताना खातीर फक्त अशक्य आशिल्ल्यान ताचे खातीर हिंसेचो, आतंकवादाचो मार्ग हाचे मुखारूय सुरू दवरप म्हणल्यार विनाशा कडेन तांचो प्रवास चालू दवरपा सारकें आसतलें होच संदेश घडये प्रधानमंत्री नरेंद्र मोदी हांणी दिल्लो आसुये. पाकिस्तान कितेंय करीत जाल्यार सुदारचो ना, हेंवूय घडये नरेंद्र मोदी हांणी संवसाराक सांगिल्लें आसुये. पाकिस्तानाचेर भरवंसो दवरूंक येवचोच ना. पूण दक्षीण आशियांत शांतताय प्रस्थापीत करपा खातीर भारताक मात आपलें यत्न जारी दवरचेच पडटले.

वामन प्रभू
9823196359