भांगरभूंय | प्रतिनिधी
डॉ. प्रमोद सावंत: शिवोले छत्रपतींच्या घोड्यार बशिल्ल्या पुतळ्याचें अनावरण
म्हापशें: छत्रपती शिवाजी महाराच हे खऱ्या अर्थान रयतेचे तशेंच सगल्या धर्माच्या लोकांचे राजा आशिल्ले. छत्रपतींच्या गुणांचें अंगीकरण करून आमचे सरकार गोंयांत सुराज्य निर्मणे कडेनपावलां मारीत आसात अशें मुख्यमंत्री डॉ. प्रमोद सावंत हांणी सांगलें.
तार शिवोले समर्थन संघटणा गोंय आनी शिवयोद्धा हांचे वतीन उबारिल्ल्या शिवरायांच्या घोड्यार बशिल्ल्या पुतळ्याचें अनावरण केले उपरांत आयोजीत केल्ले कार्यावळींत ते उलयताले.
ह्या वेळार पर्यटन मंत्री रोहन खंवटे, आमदार डिलायला लोबो, मायकल लोबो, प्रवीण आर्लेकार, समर्थन संघटणेचे अध्यक्ष निलेश वेर्णेंकार आनी हेर पदाधिकारी हाजीर आशिल्ले.
शिवाजी महाराज हे देशांतले पयले लोकपाल, पयले आरमारी नौदळाचे निर्मिते, पयले पर्यावरण पुरक प्रशासक आशिल्ले. गोंयांतलो बेतूल किल्लो हो जलमार्ग तांणीच उबारलो. छत्रपतींच्या दरबारांत केन्नाच बायलेचो नाच वा सोरो पियेवप जालें ना. शिवरायांनी आपल्या विरोधकांक हारयिल्ले आसले तरी तांची स्वराज्य आनी सुशासनांतली पकड आनी गूण आत्मसात करपा सारकें आसा. तांचे हे गूण आनी विचार आमी सगल्यांनी स्विकारीत आनी आचारणांत हाडीत जाल्यार गोंयांत सुराज्य निर्माण जावपाक वेळ लागचो ना. आमचें मंत्रीमंडळ आनी हांव हेंच सुराज्य हाडपाचे दिशेन वाटचाल करीत आसात अशें मुख्यमंत्री डॉ. सावंत हांणी म्हणलें.
सद्या गोंयांत छत्रपतींचे जाग्याजाग्यांनी पुतळे उबे जातात. राज्य भगवेमय जालां. जय भवानी जय शिवाजीचो नारो लागत आसा. ही बरी गजाल अशें मुख्यमंत्री सावंत हांणी म्हणलें.
ह्या वेळार पर्यटन मंत्री रोहन खंवटे, आमदार डिलायला लोबाे आनी हेरांनी आपले विचार उक्तायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
