भांगरभूंय | प्रतिनिधी
भारताची स्टार बॅडमिंटन खेळगडी पी व्ही सिंधू आनी युवा खेळगडो लक्ष्य सेन आयच्यान सुरू जावपी 250000 डॉलर इनामाची रक्कम आशिल्ले स्विस ओपन सर्ती वरवीं शेणिल्लो फॉर्म परतून मेळोवपाचो यत्न करतलीं.
दोन खेपे ऑलिम्पिकांत पदक जिखपी पी व्ही सिंधू पयले फेरयेंत आपल्याच देशाचे मालविका बनसोड हिच्या आड खेळटली. जाल्यार लक्ष्य सेन लेगीत भारताच्याच एच एस प्रणॉय आड खेळटलो.
तीन वर्सां पयलीं हांगा किताब जिखपी सिंधूक फाटल्या सप्तकांत जाल्ले ऑल इंग्लंड चॅम्पियनशिपीचे पयलेच फेरयेंत हार घेवची पडिल्ली. दुसरे वटेन मालविकान सिंगापूराची यिओ जिया मिन हिका हारयिल्ली. लक्ष्य सेन ऑल इंग्लंड चॅम्पियनशिपीचे क्वॉर्टरफायनलींत पाविल्लो. जाल्यार प्रणॉयाचें आव्हान पयलेच फेरयेंत सोंपिल्लें. स्विस ओपनांत भारताचो रॅकॉर्ड उत्कृश्ट आसा. सिंधू, के श्रीकांत, प्रणॉय, समीर वर्मा, सायना नेहवाल, दादल्यांच्या दोट्टी गटांत सात्विक रंकीरेड्डी आनी चिराग शेट्टी हे जोडयेन वस्तादपण जोडलां.
पॅरीस ऑलिम्पिका उपरांत लक्ष्य सेन आनी प्रणॉय पयले खेपे एकामेका आड खेळटले. पॅरीस ऑलिम्पिकांत चवथे सुवातेर उरिल्ल्या लक्ष्य सेनान फाटल्या सप्तकांत इंडोनेशियाच्या जोनाथन क्रिस्टीक हारयिल्लो, जाल्यार चिकनगुनियांतल्यान बरो जावन पुनरागमन करपी प्रणॉयाक पयले फेरयेंत हार घेवची पडिल्ली.
बायलांच्या एकोड्या गटांत आकर्षी कश्यप आनी अनुपमा उपाध्याय लेगीत खेळटलीं. कश्यपाची पयली मॅच पात्रताय फेरी हुपून आयिल्ले खेळगडे आड जातली. जाल्यार अनुपमा डॅनमार्काचे लाईन होमार्का आड खेळटली. रक्षिता श्री संतोष रामराज पयले फेरयेंत डॅनमार्काचेच क्रिस्तोफरसेना आड खेळटली.
दादल्यांच्या एकोड्या गटांत किरण जॉर्ज डॅनमार्काच्या रास्मस गेमके आड खेळटलो. प्रियांशू राजावताची मॅच स्वित्झर्लेण्डाच्या टोबियास कुएेंजी आड खेळटलो.
बायलांच्या दोट्टी गटांत त्रिसा जॉली आनी गायत्री गोपीचंद ही जोडी एलाइन म्युलर आनी केली वान बुइटेन हे जोडये आड खेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.