भांगरभूंय | प्रतिनिधी
मुख्यमंत्री डॉ. प्रमोद सावंत : केंद्रीय रांदचे कुडीचें उक्तावण
भांगरभूंय । प्रतिनिधी
पणजीः अक्षय पात्राचे जेवण फुडारांत बंदखण आनी हॉस्पिटलांत दिवपाचो सरकाराचो प्रस्ताव आसा. तशोच माधान्य आहार पुरवण करपी एकूय आपमजत गट बंद करचे नात वा तांची संख्या वाडोवचे नात. फक्त तांणी आहाराचो दर्जो बरो दवरचो. माधान्य आहारा खातीर अक्षय पात्रा वांगडा सरकाराची भागिदारी चालूच उरतली, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. प्रमोद सावंत हांचे हस्तुकीं पिळर्णा अक्षय पात्राचे केंद्रीय रांदचे कुडीचें उक्तावण जालें. ते उपरांत मुख्यमंत्री उलयताले. ह्या वेळार थळावे आमदार केदार नायक, अक्षय पात्र फांवडेशनचे उपाध्यक्ष चंचलपती दास, शिक्षण सचीव प्रसाद लोलयेंकार, शिक्षण संचालक शैलेश झिंगडे, उत्तर गोंय जिल्होधिकारी स्नेहा गिते, एनपीसीआयचे सुभाष चंद्र राय आनी हेर मानेस्त हजर आशिल्ले.
सरकारान पिळर्ण आपत्ती वेवस्थापनाचें आलाशिरो केंद्र अक्षय पात्राक रांदची कूड चलोवपा खातीर दिलां. हे रांदचे कुडींत 5 हजार विद्यार्थ्यांक जेवण रांदपाची तांक आसा. सुरवेक अक्षय पात्र अडेज हजार भुरग्यांक माधान्य आहाराची पुरवण करतली. गोंयच्या मेन्यूंत चपाती, बटाट भाजी, वाटाण्याची भाजी, कुर्मा भाजी, इडली-सांबार, सोया चंक्स, मिक्स-व्हेज पुलांव आनी हेर खाणांचो आस्पाव आसतलो.
अक्षय पात्र हे मनोहर पर्रीकार हांचें सपन तांचे पुण्यतिथी निमतान पुराय जाता हाची आपल्याक खोस जाता, अशें मुख्यमंत्री डॉ. सावंत हांणी सांगलें.
बऱ्आ दर्जाचें अन्न मेळचे म्हूण तेन्ना 2014 त अक्षय पात्राक आमंत्रीत केल्ले, पूण तें सुरू जावपाक 10 वर्सां लागलीं. जेवण हो तांचे खातीर वेवसाय न्हय जाल्यार चॅरिटी जावन आसा. अक्षय पात्र ह्या केंद्रा लागसार आशिल्ले साळगांव, कळंगूट आनी शिवोली मतदारसंघांतले सुरवेक फक्त णवी ते धावी यत्तेच्या पांच हजार भुरग्यांक माधान्य आहार दितले. ते खातीर अस्तिवांत आशिल्ले आपमजत गट जे माधान्य आहाराची पुरवण करतात ते बंद जावचे नात, अशी हमी मुख्यमंत्र्यान दिली. अक्षय पात्राचो माध्यान्य आहार घेवपी विद्यार्थी नशिबवान आसात. फुडाराक माध्यान्य आहार सोडून दनपारचें जेवण लेगीत शाळांनी अक्षय पात्र पावयतलें. ते भायर जो मेकळो वेळ अक्षय पात्रा कडेन उरता त्या वेळात बंदखण आनी हॉस्पिटलांनी जेवण तयार करून ती पुरवण करपाचो प्रस्ताव सरकारान दवरला. तशेंच लोकांक लेगीत आपल्या घरगुती कार्यावळींत वा लग्न सुवाळ्यांक अक्षय पात्राक जेवणाची ऑर्डर दिवपाक जाता, अशें मुख्यमंत्र्यान सांगलें.
वरा भितर 5 हजार जाणांचें जेवण रांदपाची तांक !
अक्षय पात्रा कडेन 1 वरा भितर 5 हजार जाणांचें जेवण तयार करपाची तांक आसा. फ्रिजर, ऑटोमॅटीक चपाती करपाचें आनी भाजी धवळपाच्या मशिना सयत नितळसाण दवरतात. जेवण फक्त 5 डीग्री इतले न्हिवून गरम जेवण अक्षय पात्र शाळां खातीर दिता. आमी अन्नाचो दर्जो आनी प्रमाणाक म्हत्व दितात. शारिरीक आनी मानसीक भलायकी खातीर पुश्टीक अन्न गरजेचें. अशीच एक रांदची कूड अक्षय पात्र दक्षीण गोंयांत घालतलें, अशी म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
