पणजेक विसरनाशिल्ले मनोहरबाब

भांगरभूंय | प्रतिनिधी

हांव पणजेक केन्नाच विसरचोंना, तुमी म्हाका सदांच वेंचून दिल्लो, पणजेकारांक दोन लोकप्रतिनिधी मेळटले ह्या उतरांनी निरोप घेवपी मनोहरबाब, तांकां शेकहँड करपाक धांवपी पणजेकार…. आयज मनोहर पर्रीकार हांची पुण्यतीथ. ते निमतान विशेश.

स्मार्ट सिटी पणजे खातीर प्रकल्पांचे प्लॅन करतना शारांतल्या गिन्यान्यांक आदले मुख्यमंत्री मनोहर पर्रीकार विश्वासांत घेताले. शारांत वेवसाय करपी, बाजारकार, उद्येगपती, नगरसेवकांच्यो बसका जाल्ल्यो. म्हापालिकेची बिल्डिंगेची सोंपणां चडटना नवे बिल्डिंगे खातीर प्लॅनय जाले, अजून बिल्डिंग पुराय जावंक ना, ती बेगीन जावची.

स्मार्ट सिटीच्या विंगडविंगड प्रकल्पांची बुन्याद घालतना पणजे, पणजेकारांक नवें कितें तरी मेळचें, स्मार्ट सिटींतल्यान रोजगार निर्मणी जावची हीच मोख आशिल्ली. पणजी स्मार्ट जातना येरादारीचे कोयंडेत ती शिरकता ते कोयंडेतल्यान पणजेक भायर काडपा पासत पणजेकारांक एकठांय येवचें पडटलें. तशी पर्रीकारांची पयलींची पणजी उरुंक ना. आयज अतीक्रमणां चड जाल्यांत. इतिहासीक बिल्डिंगो जेन्ना मातये भरवण जातात, सात- आठ मजल्यांच्या बिल्डींगे पासत येवजणी जातात तेन्ना तांचे पासून सादूर रावचें पडटलें. पणजेची ‘स्कायलायन’ (क्षितीज) सांबाळची. मांडवी न्हंय ही शाराचें खाशेलपण. तेच न्हंयेचे देगेर आदल्या मुख्यमंत्र्यांचे यादस्तीक आसा, तांचेच इतलें आदर्श. आदल्या मुख्यमंत्र्यांच्या आदर्शांतल्यान इंजिनियर, हेर वेवसाय, उद्येजकांची नवी पिळगी घडली, लोकप्रतिनिधी घडले. पणजेक हांव केन्नाच विसरचोना हें मेकळेपणान सांगपी मनोहरबाब स्मार्ट सिटीच्या रुपांत सदांच उरतले.          

स्मार्ट सिटीच्या सगल्या बसकांक सुरवेक सावन निमणे मेरेन हाजीर रावन म्हायती घेवपी पत्रकारां मदलें हांव एक. प्रसंगा वेळार तांचे कडल्यान म्हायती घेवप, तांकां म्हायती दिवप, तांच्यो प्रतिक्रिया घेवप, अचूक उतरांनी त्यो मांडप ही तेन्नाची पत्रकारिता. ‘एक राश्ट्र, एक वेंचणुके’ विशीं शारांतल्या, गांवांतल्या लोकांक कितें दिसता तें पत्रकार सांगत व्हय? आदीं तांचो अभ्यास जाल्लो आसचो.      

आदल्या मुख्यमंत्र्यांचो पयले विधानसभा वेंचणुकेचो खर्च पांच हजार रुपया, उपरांत पांचाचे पन्नास हजार, पांच लाखाचे 50 लाख रुपया. पयले वेंचणुकेक तांचे वांगडा पंचवीस घरां भोंवपी, पयलेंच न्हय निमणे वेंचणुके मेरेनचें जैत पळोवपी सुभाषबाब वेलिंगकार सर, उद्येजक राजू (कृष्णराज) सुकेरकार, सी ए संदीप कुंडयकार, डाॅ श्याम भांडारे, डाॅ. गोविंद कामत हांचो तांकां वेंचून हाडपांत व्हड वांटो. कितले वेळा, कितल्या जाणांक आदल्या मुख्यमंत्र्यान फुडले वेंचणुकेंत तुका हांव वेंचून हाडटलो हें उतर दिल्लें, त्यो यादी सांगपी हजार आसतले. पांच- धा इश्टांक उतर दिल्लें हें सत. उद्येगपती श्रीनिवास (बाबा) धेंपे हांकां भाजपाचें, विश्व हिंदू परिशदेचें वांगडीपद घेवंक लावपा फाटल्यान तांची मोख कितें आसली ते बाबा सांगतले.

उद्येगपती अशोक चौगुले हांचे बराबरीन आझाद मैदानार विश्व हिंदू परिशदेच्या भौशीक जमातींक, संघ संचलनाक हाजीर रावत व्हड जाल्ले मनोहरबाब, बांबोळी शिक्षणीक संकुल बांदपाक मुखार सरपाक पणजेकारां कडेन उलोवपी आदले मुख्यमंत्री आयज आमचे मदीं नात. तांच्यो यादी यादस्तिकाच्या रुपान आसात. ते केंद्रीय संरक्षणमंत्री जाले तरी संरक्षण मंत्रालया कडेन आशिल्ले पणजेचे जागे अजून गोंय सरकारा कडेन आयिल्ले नात. खासदार सदानंद तानावडे हांणी ते पासत केंद्र सरकाराच्या फाटल्यान लागचें. पणजे रावन तांचें उंचेलें शिक्षण जालां.  

‘इंग्लीश व्हाय, मायभास जाय’ उतरांचो काळो टी शर्ट घालून आंदोलकां वांगडा बसपी पर्रीकार हांचे बराबरीन बसपी, चलपी आयचे मुख्यमंत्री डाॅ. प्रमोद सावंत. तांकां पणजेच्या आदल्या आमदारान सत्तेची वाट दाखयली. आंदोलकांक पुलिसांनी आगशे पुलीस ठाण्यार व्हेलें, सोडोवपाक मनोहरबाब, आयच्या पणजेच्या आमदारांनी पणजे पुलीस स्टेशना मुखार केल्लो बोवाळ, तांकां पुलिसांनी घाल्लो मार, पुलिसां आड आवाज उठोवपाक आयिल्ले मनोहरबाब….. कितलींशींच रुपां गोंयकारय पितारुंक शकतात.          

दिल्ली सरकारांत सामील जावपाक आमंत्रण आयलें, घोषणा मनोहरबाबांचीच. दोळ्यांत दुकां आयलीं तेन्ना आपल्याक सांबाळून पत्रकारांक च्या दिवपाक लावपी मनोहरबाब वेगळे. तेच दिसा तिनसांजेर प्रदेश भाजपा कार्यालय आशिल्ले बिल्डिंगेत उगते माचये वेल्यान दोन उतरां सांगपाची विनवणी करपी, ‘भाई तुम आगे बढो हम तुम्हारे साथ है’ ह्यो घोशणा मंत्री सुभाषबाब फळदेसाय, आजचे प्रदेसाध्यक्ष दामू नाईक हांच्यो, मुखार हजारांनी पणजेचे मतदार. हांव पणजेक केन्नाच विसरचोंना, तुमी म्हाका सदांच वेंचून दिल्लो, पणजेकारांक दोन लोकप्रतिनिधी मेळटले ह्या उतरांनी निरोप घेवपी मनोहरबाब, तांकां शेकहँड करपाक धांवपी पणजेकार. ते गेले तेन्ना तांकां आर्गां ओंपपाक कला अकादमीत वरांचीं वरां रांकेंत रावपी गोंयचो समेस्त भौस तांच्या समाधीथळार तेच संख्येन येता.

कोणा कडेन आपलो उत्तराधिकारी उत्पल आसतले अशें आदल्या मुख्यमंत्र्यांनी सांगिल्लें व्हय? निमणे वेंचणुके वेळार (पोट वेंचणूक न्हय) तांकां म्हापशां वेंचणूक तुमी लडोवची असो आग्रो करप्यां मदीं नारायणबाब कारेकार, दत्ताबाब खोलकार, तेन्नाचे भाजपाचे उत्तर जिल्लोध्यक्ष मायकल लोबो, दिलीप परुळेकार आसात. उत्पल पर्रीकार हांकां म्हापशांतल्यान विधानसभा वेंचणुकेंत वेंचून हाडपाची जापसालदारकी तांणी घेवची पडटली. म्हापशें बदलतलें जाल्यार उत्पलच अशें सांगपाची धिटाय पर्यटनमंत्री रोहनबाब खंवटे दाखयत व्हय? नाजाल्यार रोहन, मायकलबाब म्हापशांतल्यान कित्याक वेंचून येवंक शकचेनात?

उद्येगपती श्रीनिवास (बाबा) धेंपे कांपाल वाॅक वे चेर घरकान्न पल्लवीचे बराबरीन चलतात. शिगम्याचें गाराणे घालपाक ल्हानशे घुमटेंतल्या वाठाऱ्या कडेन अंदू त्यो आसतल्यो. कार्नव्हाल मिरवणूक टिव्ही वेल्यान दयानंद बांदोडकर मार्ग रुंद जातना पळयला. मनोहरबाबां फाटल्यान तांचे कडेन पणजेकार आशेन पळयतात फुडले लोकप्रतिनिधी म्हणून. उत्पलाचेंय नांव घेतात.

 शिगम्याक राज्य पावंडो दिवंक लावपी मनोहरबाब आयज आशिल्ले जाल्यार उपप्रधानमंत्र्यां मेरेन पावपाचे. पिरायेचीं, लोकसंख्येचीं गणितां विधानसभेंतय बरेतरेन मांडपी मनोहरबाब उत्पल, अभिजाताक म्हापशां घरच्या शिगमो मिरवणुकेक व्हरताले व्हय? अंदू म्हापशां शिगम्यांक उत्पलान वचचेंच. ‘म्हाका वेंचून हाडपाक पणजेंतल्या अस्तुरेचो वांटो आसा’, अशें मेकळेपणान पणजे भगिनी मंडळाचे माचयेर सांगपी मनोहरबाब आयज आशिल्ले जाल्यार पणजी भगिनी मंडळा पासत नवे सुवातीची स्मार्ट सिटींत तजवीज करपाचे.

पणजेच्या, गोंयच्या कितल्याशाच मतदारांक मनोहरबाबांन वाट दाखयली उंचेल्या शिक्षणाची, अमेरिकेक वचपाची, सरकारी नोकरेक शिस्तीन फाॅर्म भरपाक लावपाची. गृह आधार, लाडली लक्ष्मी देसभरांत पावल्यो. गोंयांत नवी विद्यालक्ष्मी, सरस्वती येवंक शकता, होममेकर नगरसेवकांकय उपेगी जातली अशी.                  

स्मार्ट पणजी लक्ष्मीच्या पावलांतल्यान येता जाल्यार गोंयां भायर रावपी, पणजे भायर गेल्ले मतदार पणजे कित्याक येवचेनात? शिगम्या वेळार पणजेंत खेटाखेट जाता, प्रदर्शनां, फेस्तांतल्यान जावपी कोयंडेक कांपाल वाॅक वे नवी वाट आसा. ते वाटेन शिगमो वर्सा भितर वतलो, सांता मोनिका जेटी वेल्यान सरळ.

 बेतीं – पणजी पूल, झाडां लावप स्मार्ट सिटी येवजणेत आसा? याद आसा व्हय मनोहरबाबांचे इमेजीन पणजी कंपनीक? सिद्धीत तांबा, बाबा, गौरीश धोंड, उत्पल पणजी पाचवीताल्ल करतले झाडां लावन, तंत्रगिन्यानान. शांतीकायेची, ग्रीन एनर्जीची मेसेज ह्याच स्मार्ट सिटींतल्यान दिवची पडटली. कांपाल बालगणेशाची देख खाप्रेश्वरान घेवपा सारकी.  उदरगत जाली पूण कामां सारकीं जाल्लीं ना, अर्दकुटीं उरल्यांत. स्मार्ट सिटीचो कोनसो, कोनसो भोंवन फोंडकुलां कितलीं तें शिगमोत्सव समितीन मेजचीं पडटली. समितीन समाजीक वावराक लागचें. पणजेक विसरनाशिल्ल्या मनोहर पर्रीकारांवरी सकारात्मकतेन. मुखेल रस्ते, पासयो, ड्रेनेज बांदावळीच्या वावराचें आॅडिट ते सुवातींनी वचून करपाची मागणी करची.  

   सुहासिनी प्रभुगांवकार