भांगरभूंय | प्रतिनिधी
मडगांवः विरोधी पक्ष एकठांय येवचे अशें राज्यांतल्या लोकांक दिसता. ते खातीर सगळे विरोधी पक्ष विधानसभेंत एकठांय येवन लोकांचे प्रस्न मांडटले. विधानसभा वेंचणुकेक आजून दोन वर्सां उरल्यात, देखून आतांच विधानसभा वेंचणुके विशीं कसलेंय विधान करप योग्य थारचें ना अशें विरोधी पक्ष फुडारी आनी आमदार युरी आलेमांव हांणी सांगलें.
विरोधी फुडारी युरी आलेमांव हांणी ह्या युती विशीं प्रसार माध्यमांनी केल्ल्या प्रस्नाक जाप दितना वेंचणुकेक वेळ आशिल्ल्यान युती विशीं उलोवपाचो हो योग्य वेळ न्हय अशें सांगलें. राज्यांतल्या दरेका राजकी पक्षाक राज्यांत चडांत चड बळगें मेळचें आनी कार्यकर्त्यांचो आंकडो वाडोवपाची आसा अशें युरी हांणी सांगलें. जंय पक्षाची बुन्याद घट आसा थंय सद्याची स्थिती तिगोवन दवरपाचो यत्न करपाचो निर्णय काँग्रेस पक्षान स ते आठ म्हयन्यां आदीं घेतिल्लो. जायते जाण काँग्रेस पक्षांत येवपाचो विचार करतात.
सध्याचे परिस्थितींत सगले विरोधी पक्ष एकठांय रावचे अशें गोंयकारांक दिसता. देखून अशा वेळार युती विशीं उलोवप चुकीचें थारतलें. पूण विधानसभा अधिवेशनांत विरोधी पक्ष एकठांय येवन लोकांचे प्रस्न मांडटले, कारण हें लोकांच्या आनी राज्याच्या हिता खातीर करतात. तशेंच विरोधी पक्ष फुडारी राज्याच्या कल्याणाचो विचार करून सगळ्या विरोधी पक्षांक एकठांय दवरतलो असो विस्वास आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
