भांगरभूंय | प्रतिनिधी
पणजी : कला आनी संस्कृती खात्या वतीन हालींच लिस्बन,पुर्तुगालांत गोंयच्या समृद्ध आनी विवीध सांस्कृतीक दायजाचें प्रदर्शन केलें. बीटीएल लिस्बन २०२५ (बोल्सा डे टुरिस्मो डे लिस्बोआ)वर्सा गोवा पॅव्हेलियनाक बरो प्रतिसाद मेळ्ळो. गोंयच्या कला, साहित्य, फेणी, बिबिंका आनी काजू हांणी हांगच्या पर्यटकांक मंत्रमुग्ध केलें. शिल्पकलेच्या सरळ प्रात्यक्षिकांनी सगल्यांचें लक्ष ओडून घेतलें.
ह्या पॅव्हेलियनचें औपचारीक उक्तावण कला आनी संस्कृती मंत्री गोविंद गावडे हांचे हस्तुकीं जालें. ह्या वेळार पुर्तुगालांतले भारताचे राजदूत पुनीत रॉय कुंडल, आमदार प्रेमेंद्र शेट, आमदार अँटोनियो वाज, सचीव सुनील अंचिपाका, संचालक सगुण वेळीप आनी हेर हजर आशिल्ले. गोवा पॅव्हेलियनाक लागून पर्यटकांक गोंयचे अद्वितीय वळखीचो खरो आस्वाद घेवपाक मेळ्ळो. ह्या वेळार कलाकार उमाकांत पोके आनी संतोष गोवेकार हांणी आपली कला सादर केली.
संगीतकार कार्लोस गोन्साल्वीस आनी सिग्मंड डिसोझा हांणी गोंयच्या परंपरीक सुरांचे आधुनिकते वांगडा मिश्रण केलें. घुमट आनी गिटार सयत सादरीकरणान एक मधुर सांस्कृतीक अणभव निर्माण केलो. ह्या वेळार गावडे हांणी, गोंयची संस्कृती आनी दायज हाची सगळेच कडेन तोखणाय जाता. संगीत, जेवण, हस्तकला अश्या जायत्या संस्कृतीचे प्रकार संवसारीक पांवड्यार प्रदर्शीत करपाक आमकां बरीच खोस भोगता.
सुनील अंचिपाका हांणी, गोंयचे कलाकार आनी परंपरीक हस्तकला निर्मात्यांनी गोंयां पसून लिस्बन मेरेन प्रवास करून संवसारीक पांवड्यार गोंयची संस्कृती प्रदर्शीत करपाची ही पयलीच वेळ. प्रधानमंत्री विश्वकर्मा लावार्थ्यां खातीर संवसारीक पांवड्यार तांचीं कलात्मक उत्पादनां प्रदर्शी करपाचो हो पयलोच अणभव.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
