भांगरभूंय | प्रतिनिधी
बायल आनी भुरगीं उदरगत मंत्रालयाची म्हायती
पणजीः राज्यांत गरजु भुरग्यांक मानधन दिवपी पीएम कॅअर्स येवजणेची मागणी देंवत आसा. फाटल्या पांच वर्सांनी ह्या येवजण्यांची लावार्थ्यांचो आंकडो शुन्यांचेर पावला. राज्यांत फकत ६ गरजू लावार्थ्यांनी हे येवजणे खाला लाव घेतला, अशी म्हायती बायल आनी भुरगीं उदरगत संचलानलयान दिल्या.
राज्यसभेच्या पटलार लेखी प्रस्नाक जाप दितना बायल आनी भुरगीं उदरगत राज्य मंत्री सावित्री ठाकूर हिणें सांगलें, पीएम कॅअर्स येवजणे खाला गरजू भुरग्यांक पोस्ट ऑफीस खात्यांत प्रमाणशीर रक्कम जमा करतात. जाका लागून तो भुरगो जेन्ना १८ वर्सां पिराये मेरेन पावतलो तेन्ना ते रक्कमेचो बुन्यादी नीधी १० लाख जातलो. पोस्ट आॅफिसच्या म्हयनाळ्या वेतन येनजणे खाला १० लाख रुपयांच्या बुन्यादी निधीचो निवेश करून १८ ते २३ वर्सा पिराये मजगतच्या भुरग्यांक म्हयन्याळें मानधन मेळप चालू जाता. आतां मेरेन पुराय देशांत रु. ३५८ कोटी हे लावार्थी भुरग्यांच्या पोस्ट ऑफीस खात्यांत जमा जाल्यात.
गोंयांत फाटल्या चार वर्सांनी ६ लावार्थ्यांनी हे येवजणेचो लाव घेतला. फाटलीं चार वर्सां लावार्थ्यां मदीं आंकडो सेगीत देंवून फाटल्या दोन वर्सांनी हो अंाकडो शुन्याचेर पावला. वर्स २०२१त ५ लावार्थ्यांनी हे येवजणेचो लाव घेतिल्लो. वर्स २०२२ त आंकडो देंवून फकत १ लावार्थ्यांन हे येवजणेचो लाव घेतलो. मात वर्स २०२३ आनी २०२४ वर्सा एकूय अर्ज येवंकना आनी हो आंकडो शुन्य आसा.
बायलां आनी भुरगीं उदरगत मंत्रालय हे येवजणे संबंदीत मंत्रालय जशें सामाजीक न्याय आनी सशक्तीकरण मंत्रालय, उच्च शिक्षण खातें, शालेय शिक्षण आनी साक्षरता खातें, भलायकी आनी कुटूंब कल्याण मंत्रालय, पोस्ट खातें हांचे वांगडा नेमान नियाळ बसका घेता. ते भायर येवजणेची उदरगत, आतां मेरेन दिल्लो लाव, कागाळी आनी निवारण हे विशीं पीएम केअर्स पोर्टला वरवीं लावार्थ्यांचेर देखरेख दवरतात. तशेंच जिल्लोअधिकार्यांकडेन नेमान संपर्क दवरून येवजणेच्या लावार्थ्यांक भेट दिवपाच्यो सुचोवण्यो करतात, अशें मंत्रालयान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
