भांगरभूंय | प्रतिनिधी
पणजीः पणजेकारांनी व्हडा उमेदीन शुक्रारा रंगपंचम मनयली. पणजे महालक्ष्मी देवळांत दर्शन घेतले उपरांत सगले पणजेकार आझाद मैदानाचेर जमले आनी एकामेकांक रंग लायत रंगपंचम मनयली. ल्हान ते जाण्टे तशेंच राजकारणी राजकारण विसरून उमेदीन हे रंगपंचमींत वांटेकार जाले.
बिरेस्तारा सांजे वेळार होळी लासयले उपरांत गोंयच्या विवीध वाठारांनी रंगपंचम मनयली. पणजी शिगमोत्सव समितीन पणजे आझाद मैदानाचेर रंगोत्सव घडोवण हाडिल्लो. ह्या वेळार पणजेकारांनी पणजी शिगमोत्सव समिती सयत पयलीं पणजे महालक्ष्मी देवीक नमन करून गार्हाणें घातलें. उपरांत आझाद मैदानाचेर ही परब मनयली. विवीध मनरिजवणेच्यो कार्यावळी ह्या वेळार घडोवन हाडल्यो.
हे कार्यावळींत खासदार सदानंद शेट तानावडे, भाजप प्रदेशाध्यक्ष दामु नायक, महापौर रोहित मोन्सेरात, उत्पल पर्रिकार, उद्देजक श्रीनिवास धेंपो हांणी हेर नागरिकां सयत वांटेकार जावन एकामेकांक रंग लायलो. पणजी शिगमोत्सव समिती शिगम्या निमतान चार दीस शिगम्याचे मिरवणुके सयत हेर मनरिजवणेच्यो कार्यावळी आझाद मैदानाचेर घडोवन हाडटली.
रंगपंचमीची परबी भेटयताना पणजी शिगमोत्सव समितीचे अध्यक्ष श्रीनिवास धेंपे हांणी गोंय आनी कला-संस्कृती राखून दवरपाचो उलो मारलो. हें करतले जाल्यार व्हडा उमेदीन लोकांनी भायर सरचें आनी रंगपंचम मनोवची. फुडलें सप्तकभर १९ ते २४ तारखे मेरेन आमच्यो कार्यावळी आसतल्यो. ह्या कार्यावळींनी एकवटान वांटेकार जावचें अशें तांणी लोकां कडेन मागलें.
परबीं भेटयतना भाजप प्रदेशाध्यक्ष दामू नाईक हांणी सांगलें, आमी परंपरे प्रमाण म्हणटात, जें कितें वायट आसा तें होलिका दहना वेळार भस्म जालें. सगल्यांक बरी भलयाकी, गिरेस्तकाय आनी आयुष्य आंवडेतां.
मुख्यमंत्र्यान भेटयलीं होळयेचीं परबीं
मुख्यमंत्री डॉ. प्रमोद सावंत हांणी सांखळे मतदारां वांगडा रंगपंचम मनयली. रंगपंचम खेळटना चडांत चड सेंद्रीय रंग वापरचो असो उलो तांणी मारलो. आयज होळी उत्सव पुराय गोंयांत मनयतात. गोंयांत फुडले आठ दीस शिगमो चलता. उत्तर भारतांत होलिका उत्सावा निमतान होळी सुरू जाता. पूण गोंयांत परंपरीक शिगमो सादर करून होळी तितलेच उमेदीन मनयतात. होळी आनी रंगोत्सव हाची गोंयकारांक परबीं भेटयतां. रंग लायतना तो दोळ्यांत, कानांत, नाकांत, तोंडांत वचचो न्हय, ताचे वायट परिणाम कोणाक जावचे न्हय हाची जतनाय घेवची. तशेंच शक्य आसा तितले सेंद्रीय रंग वापरचे. जाका लागून कोणाकच त्रास जावचो ना आनी सगल्यांनी ही उमेद वाटून घेवची, असो उलो मुख्यमंत्र्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
