भांगरभूंय | प्रतिनिधी
नवी दिल्ली, खबरां संस्था ः फुडाराक रीण आनी नवे क्रेडीट कार्ड मेळोवपा खातीर आमी उच्च आनी बरो सिबिल स्कोअर सांबाळपाचो यत्न करतात. हे खातीर रीण आनी क्रेडीट कार्डा वरवीं पेमेंट वेळार जाता हाची आमी खात्री करतात. अशें आसून लेगीत जायते फावटीं सिबिल स्कोअर उणो जाता.
वेळार पेमेंट करपा वांगडाच क्रेडीट कार्ड धारकान आपल्या कार्ड मर्यादेच्या फकत 30% वापर करता हाची खात्री करची अशें अर्थीक तज्ञ म्हणटात. वापराची मर्यादा 70% परस चड आसल्यार क्रेडिट स्कोअर उणो जावंक शकता.
० कार्ड मर्यादेच्या फकत 30% वापर करात: तुमचो खर्च सदांच मर्यादेच्या 30% मेरेन दवरचो. देखीक एक लाख रुपया मर्यादेचेर फकत 30 हजार रुपया मेरेन खर्च करचो.
० कार्ड मर्यादा वाडोवपा खातीर अर्ज करचो: उत्पन्न स्थीर आसल्यार आनी पेमेंट इतिहास बरो आसल्यार बँकेक मर्यादा वाडोवपाची विनंती करात.
० वेगवेगळ्या क्रेडीट कार्डांतल्यान खर्च वांटप: तुमचे कडेन एका परस चड क्रेडीट कार्ड आसल्यार, नेमान बिलां 2-3 कार्डांतल्यान वांटून घेयात. हाका लागून एकूच कार्ड वापराचें प्रमाण वाडचें ना.
० क्रेडीट कार्ड खर्चाचो अलर्ट सेट करात: तुमचो खर्च 30% परस चड जालो जाल्यार अलर्ट मेळोवपा खातीर तुमच्या कार्डाचो मोबायल अॅप वा एसएमएस अलर्ट सेट करात.
उण्या क्रेडिट मर्यादेचे लुकसाण
० परत परत मर्यादा पार केल्यार बँको तुमकां अर्थीक नदरेन दुबळे मानतात.
० रिण वा नव्या कार्डा खातीर केल्लो अर्ज न्हयकारूंक शकता.
० सिबिल स्कोअर देंवल्यार फुडाराक रीण मेळप कठीण जाता.
० नकारात्मक रेकॉर्डाचो परिणाम 7 वर्सां मेरेन टिकूंक शकता – सध्या तुमी सगळे पेमेंट वेळार करतात. पूण पोरणो रेकॉर्ड बरो ना जाल्यार ताचो परिणाम तुमच्या क्रेडीट स्कोअराचेर 7 वर्सां मेरेन दिसूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
