भांगरभूंय | प्रतिनिधी
पणजी : कार्यावळीच्या सप्तका आदीं खाजगी कार्यावळी खातीर लावडस्पीकर लावपाचे आसल्यार ते खातीर 3 ते 5 हजार रुपया परवानो शुल्क भरचें पडटलें. पर्यावरण आनी हवामान बदल संचालनालयान शुल्क निश्चित करपी अधिसुचोवणी जारी केल्या.
वेवसायीक कार्यावळी खातीर एक सप्तका आदींच ऑनलायन अर्ज केल्यार 15 ते 21 हजार रुपया मेरेन शुल्क भरचें पडटलें. सरकारी, धर्मीक, पारंपरीक आनी खेळां कार्यावळीतल्या लाउडस्पीकरां खातीर शुल्क घेवचे नात.
खाजगी कार्यावळीं खातीर 7 दीस आदीं अर्ज केल्यार 3 हजार रुपया, आनी 3 ते 7 दीस आदीं अर्ज केल्यार 4 हजार रुपया शुल्क भरचें पडटलें. जाल्यार कार्यावळीच्या 3 दीस आदीं अर्ज केल्यार 5 हजार रुपया शुल्क आकारतले.
वेवसायीक कार्यावळी खातीर 7 दीस आदीं अर्ज केल्यार 15 हजार रुपया शुल्क भरचें पडटलें. 3 ते 7 दिसां मदीं अर्ज केल्यार 18 हजार रुपया शुल्क भरचें पडटलें, आनी 3 दीस आदीं अर्ज केल्यार 21 हजार रुपया शुल्क भरचें पडटलें.
बार, रेस्टॉरंट, क्लब आनी हेरांनी 3 वर्सां मेरेन संगीत/ लावडस्पीकराचे परवाने घेतल्यात तांकां हे दर लागू जावचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
