भांगरभूंय | प्रतिनिधी
वास्को: स्कूटरी वेल्यान दोगां खाश्या भावां मदीं वाद जावन धाकल्या भावान व्हडल्या भावाचो सुरो तोंपून खून करपाची घडणूक सड्यार गोंय पुनर्वसन मंडळाचे वसणुकेंत घडली. बिरेस्तारा रातीं कडेन हो प्रकार जालो. हे विशीं मुरगांव पुलिसांनी पंचनामो करून मल्लिकार्जुन घिवारी (४५) हाचे आड गुन्यांव नोंद करून ताका अटक केल्या. होळयेचे राती कडेन ही घडणूक घडिल्ल्यान ह्या वाठारांत दुख्खाचें वातावरण पातळ्ळां.
सड्यार गोंय पुनर्वसन मंडळाचे वसणुकेक जीआरबी कॉलनींत रावपी घिवारी कुटुंबांतले श्रीकांत (५०) आनी मल्लिकार्जुन (४५) ह्या दोगांय खाश्या भावां मदीं बिरेस्तारा रातीं सुमार साडे धा वरांचेर वाद जालो. मल्लिकार्जुन हाची स्कूटर सांगिनासतना घेवन गेल्ले खातीर मल्लिकार्जुनान श्रीकांत हाका जाब विचारलो. उपरांत वाद वाडत गेलो. तिडकल्ल्या मल्लिकार्जुनान सुरो घेवन श्रीकांत हांचेर वार केले. गंभीर जखमी जाल्ले श्रीकांत जमनीर कोसळ्ळे. तांच्या झगड्याच्या बोवाळाक लागून थंय एकठांय आयिल्ल्यान हे विशींची म्हायती मुरगांव पुलिसांक दिली. जखमी श्रीकांताक उपचारा खातीर चिखले उपजिल्लो हॉस्पिटलांत व्हेलो. थंय ताका दोतोरांनी मरण आयिल्ल्याचें सांगलें. ह्या खुनाच्या प्रकरणांत पुलिसांनी मल्लिकार्जुन घिवारी हाका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
