भांगरभूंय | प्रतिनिधी
पणजी : आयज पुराय देशांत तशेंच गोंयांतूय होळी मनयतात. मजगतीं, भारतीय हवामान खात्यान उश्णतायेची शिटकावणी जारी केल्या, ती फाल्यां १५ मार्च मेरेन वाडयल्या. पुराय राज्यांत उश्ण आनी दमट परिस्थिती कायम उरपाची अपेक्षा आशिल्ल्यान, लोकांनी घरा भायर सरतना आनीक जतनाय घेवपाचो सल्लो दिला.
हवामान खात्याच्या अंदाजा प्रमाण, शुक्रारा उत्तर आनी दक्षीण गोंयच्या कांय सुवातांचेर दमट परिस्थिती आसतली. तापमान ३५ अंश ते ३७ अंश मजगतीं वाडपाची शक्यताय आसा.
होळी मनयतना हायड्रेटेड रावप, योग्य कपडे घालप आनी वतांत चड वेळ घालोवचो न्हय. फाटल्या १४ दिसांनी पडिल्ल्या वताची खरसाण लक्षांत घेवन उश्णताये कडेन संबंदीत दुयेंसां जावचीं न्हय म्हणून हवामान खात्यान सगल्यांक सुरक्षीत रावपाचें आनी जतनाय घेवपाचो उलो मारला.
रॅली वा पार्टी खातीर वचपी लोकांनी उच्च आर्द्रता आनी तापमान आशिल्ल्या भागांत चड काळ रावचें न्हय. शरीराक परत हायड्रेट करपा खातीर ओआरएस, लस्सी, पन्हें, उसाचो रस, लिंबाचें उदक, ताक अशीं जायतीं घरांत करपी पिवपां वापरचीं. दिवसाच्या पीक आवर्सांत सकाळीं ११ ते सांजेवेळार ४ वरांचेर उश्णतायेक लागून पेटके आनी उश्णतायेचो झटको बसपाक शकता. लोकांनी जतनाय घेवची अशेंय हवामान खात्यान म्हणलां.
उत्तर आनी दक्षीण गोंय जिल्ह्यांत १९ मार्च मेरेन हवामान सुकें रावपाचो अदमास आशिल्ल्यान, फुडल्या सात दिसांनी चडांत चड तापमान ३४ अंश ते ३६ अंश मजगतीं उरतलें. सध्याचें उश्ण आनी दमट हवामान फुडले कांय दीस ‘आसा तश्शें’ उरपाची शक्यताय आसा.
आयज शुक्रारा पणजे चडांत चड तापमान दनपरां १.३० मेरेन ३५.४ अंश नोंद केलो. जाल्यार मुरगांवां हवामान ३६.२ अंश मेरेन पाविल्लें. दोनूय भागांत उण्यांत उणें तापमान २४.६ अंश नोंद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
