भांगरभूंय | प्रतिनिधी
पणजी ः गोंयांत शिगमो सुरू जाला. शिगम्याच्या मांडार पारंपारीक पद्दतीन नमन करुन शिगम्यांतले वगवेगळे खेळ खेळटात. मजगतीं, केप्यां तालुक्यांतल्या कणीबाग, मोरपिर्ला एक धक्को दिवपी घडणूक घडल्या. काल सांजवेळार हांगाच्या वेळीपांच्या शिगम्यांच्या मांडार तासो वाजयतना श्रीकांत गांवकार (50, काजुवाडो, कणीबाग- मोरपिर्ला) हांकां काळजाचो खर आताक आयिल्ल्यान ते सकयल पडले. त्या वेळार हाजीर आशिल्ल्यांनी तांकां रोखडेच हॉस्पिटलांत व्हरपाची वेवस्था केली. मजगतीं तांकां आनीक एक खर आताक आयलो आनी मरण आयलें.
श्रीकांत गांवकार वीज खात्यांत काम करताले. तांणी मोरपिर्लाचे पंच पदाचेरुय काम केलां. गांवकार एकता युवा संघाचे संयुक्त सचीव म्हणूनय ते काम करताले. फाटल्या दोन दशकां सावन समाजीक मळार ते सक्रीय आशिल्ले. हे घडणुकेक लागून पुराय तालुक्यांत दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
