भांगरभूंय | प्रतिनिधी
विरोधकांकूय मुद्दे मांडपाची समान संद मेळची : बसकेंत मागणी
पणजी : अधिवेशनाचो काळ सल्लागार समितीचे बसकेंत थारायनात. सरकार अधिवेशनाचो काळ निश्चीत करता. कामकाज सल्लागार समितीचे बसकेंत अधिवेशनाचें काम थारायता, अशें सभापती रमेश तवडकार हांणी सांगलें. तीन दिसांच्या अधिवेशनाच्या काळाक विरोधकांनी हरकत घेतिल्ल्याची म्हायती सभापतींनी दिली.
विधानसभेचें अर्थसंकल्पीय अधिवेशन २४ मार्च ते २६ मार्च अशे तीन दीस जातलें. सभापती तवडकार हांचे अध्यक्षते खाला बुधवारा कामकाज सल्लागार समितीची बसका जाली. हे बसकेक मुख्यमंत्री डॉ. प्रमोद सावंत हांचे सयत विधीमंडळ कामकाज मंत्री आलेक्स सिक्वेरा, विरोधी पक्ष फुडारी युरी आलेमांव, आमदार वेंझी व्हिएगस, आमदार विरेश बोरकार हजर आशिल्ले. गोवा फॉरवर्डचे आमदार विजय सरदेसाय बसकेक हजर नाशिल्ले.
सभापतींक पत्र धाडून तांणी कामकाज सल्लागार समितीची बसका म्हळ्यार सोपस्कार आशिल्ल्याची टिका तांणी केली. सत्ताधारी पक्षाप्रमाण विरोधी पक्षाच्या आमदारांकूय अधिवेशनांत प्रस्न मांडपाची समान संद मेळपाक जाय, अशी मागणी विरोधी पक्ष फुडारी युरी आलेमाव तशेंच हेर विरोधी आमदारांनी केली. कामकाज सल्लागार समितीची (बीएसी) बसका होच एकूच सोपस्कार आशिल्ल्याचीय टिका बसके उपरांत विरोधी पक्षाच्या आमदारांनी केली.
अधिवेशन तिनूच दिसांचें आशिल्ल्यान सामकें उणें कामकाज जातलें. हाका लागून प्रस्न तशेंच मुद्दे मांडपा खातीर जाय तशी संद आमदारांक मेळची ना. अधिवेशन तीन दिसांचेंच जाल्ल्यान खासगी प्रस्ताव सादर करपा खातीर दीस आसचे नात. कामकाज सल्लागार समितीचे बसकेंत ह्या गजालींक हांवें आक्षेप घेतलो, अशें विरोधी पक्ष फुडारी युरी आलेमाव हांणी बसके उपरांत म्हणलें. शुक्रारा पयलीं अधिवेशन सोंपल्यार नेम ३१ शुक्रार सोडून दुसरो दीस खाजगी प्रस्तावां खातीर दिवपाचो पर्याय उपलब्ध आसा. हो विशयूय हांवें हजर केल्ल्याचें युरी आलेमाव हांणी म्हणलें.
कामकाज सल्लागार समितीचे बसकेची स्थितीय घणसा बैलांचे बसकेवरीं जाल्ल्याची टिका आमदार वेंझी व्हिएगस हांणी केली. अधिवेशनांत जीं विधेयकां मांडटात, ताची प्रत आमदारांक ४८ वरां पयलीं मेळपाक जाय. विधेयक मांडण्याच्याच दिसा प्रत मेळिल्ल्यान अभ्यास करपाची संद आमदारांक मेळना. अधिवेशनाचो काळ आनी कामकाज सरकाराचे मर्जी प्रमाण थारिल्ल्यान कामकाज सल्लागार समितीची बसका हो फकत सोपस्कार जावन आसा. तरी बसकेक हजर रावन विरोध करप हें आमचें कर्तव्य, अशें वेंझी व्हिएगस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
