भांगरभूंय | प्रतिनिधी
राज्याचो अर्थसंकल्प 26 मार्चाक जातलो सादर
पणजीः मुळाव्या शिक्षणा संबंदीं राज्याचें माध्यम धोरण स्पश्ट आसा. ह्या धोरणाची अंमलबजावणी चालू आसा अशी म्हायती मुख्यमंत्री डॉ. प्रमोद सावंत हांणी दिली. 26 मार्चाक राज्यांचो अर्थसंकल्प सादर करतले अशेंय तांणी सांगलें.
अर्थसंकल्पीय अधिवेशनाच्या कामकाजाचेर निर्णय घेवपा खातीर बुधवारा सल्लागार समितीची बसका जाली. हे बसके उपरांत ते उलयताले. अधिवेशनांत अर्थसंकल्प सादर करतले पूण ताचेर चर्चा जावची ना. लेखानुदानाक मंजूरी दितले. फुडल्या अधिवेशनांत अर्थसंकल्पाचेर चर्चा जातली देखून तें दीर्घकाळाचें आसतलें अशें मुख्यमंत्री डॉ. प्रमोद सावंत हांणी सांगलें.
गोंयचे पयले मुख्यमंत्री भाऊसायब बांदोडकार हांणी सुरू केल्ल्यो मुळाव्यो शाळा ल्हवू ल्हवू बंद जावपाक लागल्यात. मुळाव्यो शाळा चालू उरपा खातीर मुळाव्या शिक्षणाचें माध्यम इंग्लीश आसूंक जाय. मराठी आनी कोंकणी विशय सक्तीचो करपाक जाय अशी मागणी आमदार मायकल लोबो हांणी केल्या. हे विशीं विचारलें तेन्ना मुळाव्या शिक्षणाच्या माध्यमा खातीर धोरण स्पश्ट आसा अशी मुख्यमंत्र्यांनी जाप दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
