भांगरभूंय | प्रतिनिधी
रस्तो येरादारी मंत्रालय आनी कोंकण रेल्वे मदीं समजीकाय कबलात
मडगांवः राष्ट्रीय म्हामार्गाचेर बोगद्यांचें काम चालू आसतना आतां कोंकण रेल्वे कडल्यान तंत्रीक सहकार्य मेळटले. रस्तो येरादारी आनी म्हामार्ग मंत्रालयान कोंकण रेल्वे कॉर्पोरेशन लिमिटेड कंपनी कडेन बोगदे बांदपाच्या वेळार तंत्रीक सहकार्या खातीर कबलात केल्या.
कोंकण रेल्वे मार्गाचेर बोगदे बांदपाचे आनी सांबाळपाचे काम कोंकण रेल्वे म्हामंडळान बरे केलां. हाचो फायदो आतां राष्ट्रीय म्हामार्गाचेर बोगद्याच्या कामांत जातलो. ते खातीर कोंकण रेल्वे कॉर्पोरेशन लिमिटेड आनी रस्तो येरादारी आनी म्हामार्ग मंत्रालय हांचे मदीं नवी दिल्लीत सामंजस्य कबलातीचेर सय केल्या.
कोंकण रेल्वेचे अध्यक्ष आनी वेवस्थापकीय संचालक संतोष कुमार झा, रस्तो येरादारी आनी म्हामार्ग मंत्रालयाचे महासंचालक सुदीप चौधरी आनी कोंकण रेल्वे आनी रस्तो येरादारी मंत्रालयाचे वरिश्ठ अधिकाऱ्यांचे हाजिरेंत ही कबलात जाली. कोंकण रेल्वेच्या कुशळटायेचो फायदो घेवन बोगद्याची सुरक्षीतताय आनीक घटमूट करप, बोगदो प्रकल्पां खातीर उपाय सुचवप, आनी राष्ट्रीय म्हामार्गां वयल्या परस्पर फायद्याच्या हेर वाठारांचो आस्पाव करप हाचेर भर दितले.
ह्या सहकार्य कबलातीक लागून सुरक्षेचे पर्याय वाडटले, आनी बोगदो प्रकल्पांची अंमलबजावणी गरजे प्रमाण जातली. ही सामंजस्य कबलात तंत्रीक नदरेन उत्कृश्टताय आनी मुळाव्या साधनसुविधा सुरक्षे कडेन म्हत्वाचें पावल थारता. देशभरांतल्या राष्ट्रीय म्हामार्गांचेर प्रकल्पांत सुदारणा जातली अशें ह्या वेळार जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
