भांगरभूंय | प्रतिनिधी
पणजीः प्रधानमंत्री गरीब अन्न कल्याण येवजणे खाला राज्यांत २६ हजार मेट्रीक टन इतलें कड्डण फाटल्या धा म्हयन्यांत राज्यांक फावो जालां. राष्ट्रीय अन्न सुरक्षा कायदो (एनएफएसए) खाला येवपी राशन कार्ड धारकांक हे येवजणे खाला कड्डण फुकट मेळटा, अशी म्हायती अन्न आनी नागरी पुरवण मंत्रालयान दिल्या.
राज्यसभेच्या पटलार लेखी जाप दितना केंद्रीय अन्न आनी नागरी पुरवण राज्य मंत्री निमुबेन जयंतीभाई बांभणिया हांणी ही म्हायती दिल्या.
देशांत एनएफएसए खाला ८१.३५ कोटी लावार्थ्यां मदल्या ८०.५६ कोटी लोकांक प्रधानमंत्री गरीब कल्याण अन्न येवजणे खाला फुकट कड्डण मेळून एनएफएसचे ९९.०३ टक्के नागरीकांचो आस्पाव हे येवजणे खाला जाला. एनएफएसए सकयल राज्य पात्र घराब्यांक अंत्योदय अन्न येवजण (एएव्हाय) आनी प्रायोरीटी हावसहोल्ड (पीएचएच) कार्डां दितात आनी हांकां हें कड्डण फुकट मेळटा.
ते भायर ह्या कड्डणा भितर फोर्टीफायड तांदळाचो आस्पाव आसा आनी भौशीक वितरण पध्दवी वरवी सगळ्या राज्यांत हे फोर्टीफायड तांदूळ फुकट लाभार्थ्यां मेरेन पावतात. ह्या फोर्टीफायड तांदळांत सुक्ष्म पोशक तत्व जशे लोह, फोलीक एसीड आनी व्हीटामीन बी १२ हांचो आस्पाव करून एनेमीया सारक्या दुयेंसाआड लडो दिवपाक मजत करता.
एप्रील २०२४ ते फेब्रुवारी २०२५ मेरेन गोंय राज्यांक प्रधानमंत्री गरीब अन्न कल्याण येवजणे खाला २६,६९० मेट्रीक टन कड्डणाची पुरवण जाल्या. तातुंतलें उत्तर गोंयाक १३,०६४ मेट्रीक टन आनी १३,६२६ मेट्रीक टन इतल्या कड्डणाची पुरवण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
