भांगरभूंय | प्रतिनिधी
परत नेटान आरजीपी करतली कामाची सुरवातः मनोज परब
पणजीः कॉंग्रेस आनी आम आदमी हे दोनूय पक्षांच्या अध्यक्षांचें बरेंपण भाजपा वांगडा आसा. भाजपाचो फायदो करून दिवपा खातीर हे रेव्ह्युलेशनरी गोवन्स पक्षाची मतां फोडटात. फाल्यां हांचे आमदार निवडून आयल्यार लेगीत ते भाजपातच वतले. म्हादय, जमीन, बेरोजगारी प्रस्न फकत आरजीपी सोडोवपाक शकता. दिल्लीचे पक्ष न्हय, अशें आरजीपीचे अध्यक्ष मनोज परब हांणी सांगून परत उजो मोडांत काम करपाचें जाहीर केलें.
आरजीपीन पणजे कार्यालयांत आफयिल्ले पत्रकार परिशदेंत मनोज परब उलयताले. ह्या वेळार आरजीपीचे आमदार विरेश बोरकार, सरचिटणीस विश्वेश नायक आनी भांडारी अजय खोलकार हजर आशिल्ले.
ह्या वेळार उलयतना मनोज परब हांणी म्हादय आनी इंडी आघाडीच्या विशयावेल्यान आप आनी कॉंग्रेशीक उजरावन काडले.
२०२४ चे वेंचणुकेंत आमी कॉंग्रेस आनी आपाचेर विस्वास दवरिनासतना स्वतंत्र झगडले. त्या वेळार आमी आघाडीचो भाग कित्याक जायना म्हण, पक्षाक तशेंच आमच्या वावुरप्यांक फटींग म्हणून आमचेर चेंपण घालताले. इतले दीस हातान हात घालून झोडून मारया अशें सांगून आरजीक ‘बी टीम’ म्हणटाले. काल दिल्लीची आदली मुख्यमंत्री आतिशी गोंयांत आयली आनी कॉंग्रेस विश्वासघातकी म्हणून युती मोडून उडयली, आतां खरी बी टीम कोण, असो प्रस्न मनोज हांणी विचारलो.
जेन्ना म्हादय वाटोवपा खातीर आमी स्वतंत्र लढो उबारले तेन्ना आमी सेव्ह म्हादय ह्या पंगडाक तेको दिना म्हण आमचेर आरोप जाले. पूण कर्नानटकांत कॉंग्रेस सरकार स्थापन जातकच सेव्ह म्हादय ही चळवळ बंद पडली. आमी कर्नाटक सरकाराकडेन बंगळुरू वचून गोंयचें हित राखपाचो उलो मारचो अशी मागणी आमी अमित पाटकार आनी युरी आलेमाव हांचेकडे केल्ली. मात तांणी सुलेमाना खातीर पत्र बरयलें. पूण म्हादय खातीर न्हय. तशेंच तांचो खासदार व्हीरीयातो फर्नांडीस हांणी संसदेंत लेगीत हो विशय मांडूंक ना, असो आरोप मनोज हांणी केलो.
फकत सिटां खातीर आप आनी कॉंग्रेशीचीं हीं नाटकां चल्ल्यांत. वेचणूके वेळार युती करून हे वेंचणूक लढटले आनी वेंचून येतकत दोनूय पक्षांचे आमदार भाजपांत वयतले. हे दोनय पक्षांच्या अध्यक्षांचे भाजपाकडे बरेंपण आसा. ७ म्हयने विसव घेवन आमी लोकांची भेट घेवप, चालू करून पक्षाच्यो बसका घेतल्यात आनी आमी परत नेटान कामाक लागतले, अशें मनोज हांणी म्हणलें.
गोंयची जमीन, म्हादय आनी बेरोजगारीचेर फकत आरजीपीनूच आवाज काडिल्लो असो दावो आमदार विरेश बोरकार हांणी केलो.
गोंयकारांक परवडपी दरांत जमनी मेळनात. गोंयची जमीन राखपा खातीर जमीन संरक्षण विधेयक हें आरजीपीन हाडिल्लें. पूण दिल्लीच्या पक्षांनी ताका तेंको दिवंकना. सगळ्या आमदारांनी आपली भुमिका ह्या विशयाचेर स्पश्ट करपाक जाय. जमनी विशीं कायदो मागपी हो फक्त आरजी पक्ष आसा, अशें विरेश हांणी सांगलें.
गोंयचे भुरगे शिकतात. पूण तांकां खाजगी तशेंच सरकारी नोकर्यो लागनात. पोगो बिला खाला आमी गोंयकारांक नोकर्यो दिवपाचें आस्वासन दिल्लें. पूण मोपा विमानतळ, आयुष हाॅस्पिटल सारक्या प्रकल्पांत गोंयकारांक वांटो ना तांकां नोकर्यो सोदपाक भायर वयचें पडटा, अशें विरेश हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
