भांगरभूंय | प्रतिनिधी
गोंय मराठी पत्रकार संघान संवसारीक बायलां दिसाचें निमित्त सादून मुंबयंतल्या सृजन विरार ह्या नामनेच्या संस्थेची निर्मिती आशिल्ल्या ‘कल्पवृक्ष कन्येसाठी’ ह्या जनकवी पी. सावळाराम हांच्या गाजिल्ल्या गितांचेर आदारीत संगिताच्या कार्यावळींचें तीन सुवातांनी आयोजन केलां. मडगांवचें रवींद्र भवन आनी कला अकादमीतल्या प्रयोगांचें आयोजन पत्रकार संघा कडेन आशिल्लें, जाल्यार सांखळेंतलो प्रयोग आमच्या सहकार्यान रवींद्र भवनान आयोजीत केल्लो. पस्तीस चाळीस दिसां आदींच तिनूय थिएटरां राखून दवरपा खातीरचे सोपस्कार केल्ल्यान कार्यावळींच्या प्रत्यक्ष आयोजना वेळार कसलीच अडचण येवपाचो प्रस्नूच नाशिल्लो. प्रयोग सादर करपी संस्थेच्या संचात नामनेची पार्श्वगायिका माधुरी करमरकर, धनंजय म्हसकर, प्रज्ञा गावंड, सारेगमपची लिटल स्टार पलाक्षी दीक्षित अशा खूबशा कलाकारांचो आस्पाव आशिल्लोच, पूण तेचबरोबर प्रत्यक्ष पी. सावळाराम हांचे सयत वादक कलाकार म्हूण तांकां साथ दिवपी एक दोन वादकूय ह्या संचात आशिल्ल्यान सुजाण गोंयकार रसिकांनी ह्या प्रयोगाक दाद दिवप अपेक्षितूच आशिल्लें. जालेंय तशेंच. तरी लेगीत आयोजन ह्या नात्यान आमचेर खूबशा रसिकांनी तिडक उक्तावन वेळार प्रयोग सुरू करूंक नाशिल्ले खातीर आमकां धारेर धरले, आनी अशे दर्जेदार प्रयोग अर्द्यार सोडून वचपाची पाळी आमचेर हाडूं नाकात अशेंय आमकं सुनायलें. रसिकांक तिडक येवप ही काय नवी गजाल न्हय. पूण हें सगलें टाळूंक येवप शक्य आसा काय कितें हो खरो प्रस्न आसा.
कला अकादमी आसूं वा हेर एक दोन सुवातांनी हाचे आदीं नाट्यप्रयोग आनी एखादी कार्यावळ प्रत्यक्ष वेळारूच सुरू जावंक नाशिल्ल्यान गडबड गोंदळ घालपी रसिकां मदीं हांवेंय कांय वेळा वांटो घेतला. ताका लागून रसिकांच्यो त्या वेळा वेल्यो भावना समजूंक शकतां. पूण एक आयोजक म्हूण रसीक प्रेक्षकांक सामकार वचपाची वेळ ‘कल्पवृक्ष कन्येसाठी’ च्या प्रयोगांक लागून पयलीं मडगांवां रवींद्र भवनांत जाल्यार दुसऱ्याच दिसा पणजे कला अकादमींत गोंय मराठी पत्रकार संघाचो अध्यक्ष ह्या नात्यान म्हजेर आयली आनी आयोजकांक कसले अडचणींक तोंड दिवचें पडटा ह्या निमतान काय जायना वाचा फोडपा खातीर हो प्रपंच करीत आसा. अर्थांतच हे खातीर कोणाचेरूय खापर फोडप हो ह्या लेखाचो हेतू मुळांतूच ना. जाल्यार एकूण वेवस्थेंत सुदारणा जावन रवींद्र भवन आनी कला अकादमीन आयोजक संस्थांक तांणी व्हड कश्टान सादर केल्ल्या कार्यावळीं पुरतो विचको जावपा पसून मात्शी थाकाय दीत जाल्यार हो लेख सार्थकी लागलो अशें हांव समजन. कला अकादमी वा रवींद्र भवनांतल्या अर्थवेवस्थेचो फटको रसीक आनी प्रेक्षक आनी आयोजक संस्था हांकां हाचे मुखार बसचो न्हय अशें म्हाका मनांतल्यान दिसता आनी फाटल्या शुक्रारा आनी शेनवारा आयोजक ह्या नात्यान पत्रकारांचे हे संस्थेक आयिल्ल्या कोडू अणभवांचेर बरोवप रास्त आशिल्ल्याचें हांव मानतां.
कलेच्या मळार आयजकाल गोंयांत ‘रात्र थोडी सोंगे फार’ अशी कितेंशीं परिस्थिती जाल्ली पळोवंक मेळटा. हाचो प्रत्यक्ष अणभव आमच्या कार्यावळीच्या आयोजना वेळार मडगांव, पणजे आनी सांखळे आमी घेतलो. सगली कडेन वेगळ्यावेगळ्या कार्यावळींची आशिल्ली रेलचेल पळयत जाल्यार एखाद्या कार्यावळीचें वेवस्थीत आनी सुनियोजीत आयोजन करपाक वाव दिवप हें दरेककडच्या वेवस्थापना खातीर एक आव्हानूच आसता. कटाक्षान कांय गजाली टाळीत जाल्यार निश्चीतपणान हातूंत कांय सुदारणा जावपाची आस्त बाळगूं येता. मडगांव रवींद्र भवनाचे अध्यक्ष आनी उपाध्यक्ष हे जाल्यार आमचे खूबशा तेंपा सावनचे इश्ट. तांणी सगलें तरेचें सहकार्य आमकां केलें हें मान्य करचेंच पडटलें. तरी लेगीत एकूण वेवस्थेक जी दिशा खूबशा तेंपा सावन मेळ्ळ्या तातूंत थोडोसो बदल जायत जाल्यार खूबशी थाकाय आयोजक संस्थांक मेळूंक शकता. शुक्रारा अशेंच कितेंशें जालें आनी साडेसात वरांचेर सुरू जावपाचो आशिल्लो आमचो प्रयोग सुमार पावणे णवाक सुरू करी मेरेन जी खरस काडची पडली तीं उतरांनी सांगूंक येवचीं ना. ज्या थिएटरांत आमची कार्यावळ आशिल्ली थंय पयली एका शालेय संस्थेचें स्नेहसंमेलन आशिल्ल्यान वेळारूच स्टेजीचो ताबो मेळप कठीण जालें. सात वरांचेर स्टेजीचो ताबो मेळ्ळे उपरांत अर्द वरा भितर कसलीच कार्यावळ, मागीर ती सादी लेगीत आसूं सुरू करप अशक्यूच आशिल्लें. आमची कार्यावळ जाल्यार संगिताची. नामनेच्या गायकांची. मागीर जावपी धांवपळ आनी रसिकांच्या येवपी चेपणांतल्यान जावपी चुको हाका शीम नासता.
गायकांचे बसके खातीर जे प्लॅटफॉर्म लागतात ते निदान वेवस्थीत मेळचे अशी अपेक्षा आसता. पूण हांगा नेमकें अशें जालें की दुसरी कडेन चालू आशिल्ल्या ‘नाट्यानंद’ ह्या कार्यावळी खातीर प्लॅटफॉर्म उबारिल्ले आनी आयोजक संस्थेची ते खातीर अदिकूच पंचायत जावप अपरिहार्य थारता. सभाघरा भायर जाल्यार प्रेक्षकांचो वाडटे गरमेंतलो दबाव मुखेल दार उक्तें करपा खातीर आसता तो वेगळोच. जें मडगांव रवींद्र भवनांत तशेंच दुसऱ्या दिसा कला अकादमींत. हांगा जाल्यार दनपारचो वेळ एका तियात्रा खातीर दिल्लो. अदमास घेत जाल्यार सात वरां मेरेन तियात्र सोंपपाची शक्यताय दिसनाशिल्ली. तियात्र आयोजकांक ‘बाबापुता’ करीत तीन कातरां कापूंक लायलीं तेन्ना खंय सात वरांचेर स्टेज मेळ्ळी. हांगा जाल्यार मनीसबळाचोय दुकळ. भायर ‘सारस’ हें प्रदर्शन लागिल्लें, ताका लागून पार्किंगेचे बारा शुक्रार. भितर वचूंक मेळना जाल्यार भितर गेल्ल्यांक भायर येवंक मेळना अशी परिस्थिती. गायक कलाकारांक घेवन आयिल्ल्या वाहनाकूय भितर प्रवेश मेळप कठीण आशिल्लें. स्टेज वेवस्थापका कडेन ते खातीर संपर्क सादचो पडलो. आतां हें सगल्यांकूच शक्य जाता अशें ना. कला अकादमीच्या दोन दालनांत नाणें प्रदर्शन भरिल्लें. गायक कलाकारांक तियात्र सोंप मेरेन वेवस्थीत बसपाचीय सोय ना. हांगासरली कार्यावळ निमाणें सवाय आठ वरांचेर सुरू जाली तेन्ना भायर रसीक बोब मारून थकिल्ले. ताचो जावपाचो तो परिणाम जालोच. मध्यंतराक खूबशा जाणांक नायलाजान वच्चें पडलें आनी ताची तिडक तांणी आमचेर काडप सहाजिकूच आशिल्लें. एका बऱ्या कार्यावळींतल्यान तांकां वच्चें पडलें हो कितें आयोजकांचो दोश असो थोडोच म्हणूं येता. ते तुळेन सांखळे रवींद्र भवनांतली एकूण वेवस्था खूब बरी दिसली. थंय उण्या प्रमाणांतलें मनीसबळ तोखणाय करपा सारकें आशिल्लें. मडगांवां आनी पणजेंत मात ‘चलता है’ मानसीकतेक ब्रेक लावचो पडटलो तेन्ना खंय रसिकांक दर्जेदार कार्यावळींचो पुराय वेळ आस्वाद घेवंक मेळटलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
