भांगरभूंय | प्रतिनिधी
पंधरा वर्सां आदीं 2007 वर्सा गोंयचे मुख्यमंत्री जावपाचो मान काँग्रेस पक्षान त्या तेंपार भाजपांतल्यान काँग्रेसीत पाविल्ले आमदार दिगंबर कामत हांकां दिल्लो. तेन्ना गोंय काँग्रेसीची प्रभारी म्हणून गोंयची आदली राज्यपाल मार्गारेट आल्वा काम पळयताली. तांणीच दिगंबरबाबांक गोंयच्या मुख्यमंत्रीपदा मेरेन व्हेल्लें आनी योगायोगान ती आयज उपराष्ट्रपतीचे वेंचणुकेच्या झुजांत आसात.
दिगंबरबाबांची स्थिती मात ना घर का ना घाट का अशी जाल्या आनी त्याच बदलपी राजकी ल्हारांचो लाव गोंय सरकाराक जातलो.
विखुरिल्ली, विस्कळीत जाल्ली काँग्रेस एकवटीत जावप तशें कठीणच. काँग्रेसीचे बरेच फुडारी भाजपांत पावल्यात, तांकां मानाचें पानय फावो जालां. केंद्रीय मंत्री ज्योतीरादित्य शिंदे हांचे सारके तरणाटे फुडारी विमान येरादारी मंत्रालय जे कुशळतायेन हाताळटात तें पळयल्यार तांकां काँग्रेसीन फाटीं कित्याक दवरिल्लें, हो प्रश्न हेर काँग्रेस फुडारी विचारतलेच. तशाच विचारांतल्यान दिगंबरबाबांचीय घुस्मट जाल्या आसत व्हय? विधानसभेचे वेंचणुके वेळार काँग्रेसीन तांकां सारकें विश्वासांत घेतलें ना हें आतां तांच्या उलोवपांतल्यान लोकांक कळ्ळां. म्हादय न्हंयेचेर दोळो दवरिल्ले, म्हादयचो तंटो दोन राज्यांच्या सरकारांनी एकामेकांच्या बसकांतल्यान सुटावो जावचो अशे विचार उक्तावपी काँग्रेस फु़डारी दिनेश गुंडू राव हेय कर्नाटकांतले. घोग्यांनी पावस पडटा आसतनाच गोंय काँग्रेस विधिमंडळ गटांत जाल्ल्या राजकी हुंवाराक लागून ते गोंयांत आयले. एके वटेन कर्नाटकांतले म्हादयचें आनी दुसरे वटेन महाराष्ट्रान तिळारीचें उदक गोंयचे वाटेन सोडलां, ताचो धपको शिमे वेल्या गांवांक बसला अशी भास सैममोगी उलयताले. तेन्नाच काँग्रेसीचो हुंवार श्री. राव हांणी आडायला, प्रदेश काँग्रेसीचे अध्यक्ष अमीत पाटकार हांणी दिगंबरबाबांक आनी विरोधी पक्ष मुखेली जावंक नाशिल्ल्या आमदार मायकल लोबोंच्या तकलेर अपात्रतायेची तरसाद दवरल्या, अशो खबरो पातळल्यो. गोंय विधानसभेंतल्या विरोधी वांगड्यांनी ते विशी जें वातावरण विधानसभेंत तापोवपाचें तें तापयलें ना. विरोधी वांगड्यांची जापसालदारकी कितें आसता, राजकारण कशें करपाचें आसता तें आदले केंद्रीय कायदोमंत्री रमाकांत खलप, हालींच दुबावीत क्रिकेट घोटाळ्यांतल्यान भायर सरिल्ले, चड तेंप विधानसभेच्या सभापतीपदार आशिल्ले दयानंद नार्वेकार हांचे कडल्यान शिकपा सारकें आसा. भाजपाचे गोंयांतले पयले मु्ख्यमंत्री मनोहरबाब पर्रीकर त्याच राजकारणातल्यान मु्ख्यमंत्री पदा मेरेन पाविल्ले हे कशे विसरुंक येतलें? सध्याचे मु्ख्यमंत्री डाॅ. प्रमोद सावंत फाटल्या तीन वर्सांच्या राजकारणान भोव शाणे जाल्ले दिसले, तांणी तशेंच प्रदेश भाजपान काँग्रेसीतल्या खवदळाचेर दिल्ल्यो प्रतिक्रिया गोंयांत जावपी फुडल्या राजकारणाचे संकेत आसात. विधानसभेत डाॅ. सावंत हाणी विरोधकांक दिल्ल्यो जापो तांच्या जाणतेपणाची (पिरायेन न्हय अणभवान) गवाय दितात. आपल्याक जाय तांकां तांणी लागीं केन्नाच केलां आनी थंयच तांच्या सरकाराक बळगें मेळटलें अशें दिसलें तऱी तांच्याय सरकारांत निर्शेणी ना अशें म्हणूक येता व्हय? त्या भायर अपात्रतायेच्यो तरसादी मोडून विधानसभेंत पाविल्ले फुडारीय सरकार, विरोधी वांगड्यां मदीं आसात, पूण तांकांय मुख्यमंत्री घुस्पावन दवरतले अशें चिन्न दिसता.
विरोधी पक्ष मुखेली नासतना विधानसभेचो वावर सरकार सोंपेंपणान फुडें व्हरतना विरोधी वांगड्यांचे मुखेलीपण करपाचे येत्न गोवा फाॅरवर्डाचे अध्यक्ष विजयबाब सरदेसाय हांणी केले. तांणी आनीक बरो अभ्यास केल्लो जाल्यार खणी सुरू करपाच्या विषयाचेर सरकाराक चपक्यांत धरपाक तांकां जैत मेळटलें आसलें. केंद्र सरकार संसदेच्या ह्याच अधिवेशनात खण कायदो दुरुस्ती विधेयक मांडटा ताचो फायदो गोंयांक मेळटलो?
विरोधी पक्ष मुखेलीपद सांबाळप सोपें न्हय, एकादऱ्या विषयाचेर आपले बसपाचे सुवातेर उबे रावन वांगडच्यांक विधानसभेंच्या बांयत धाडप, जाय तें मेळोवपाचो वावर आदले मुख्यमंत्री पर्रीकार हांणी केलां, तांची देख घेवपा सारकी. तांच्या उपरांत जाल्ले विरोधी वांगडी दिगंबरबाब वा आदले मुख्यमंत्री प्रतापसिंह राणे आसूं मनोहरबाबां वरी खर नासले तरी तांणी कांय विशय शिस्तीन मांडून मतदारसंघांतले, गोंयच्या विकासाचें, सर्वसादारण लोकांचें कामकाज मार्गाक लायलां. तांचें शिक्षण, तांचो अभ्यास, दोन तीन भाशांचे गिन्यान म्हत्त्वाचें.
दिगंबरबाब मुख्यमंत्री जातकच तांकां तांचे सरकार चलोवपाकच न्हय म्हत्वाचे कायदे करपाक श्री. राणे, मनोहरबाबांनी व्हड आदार दिला. मनोहरबाबांच्या मजतीन मडगांवचे दक्षिण जिल्लो हाॅस्पिटल, दक्षिण जिल्लो कार्यालय दिगंबरबाबांन पुराय केलें.
दोगांयनी एकामेकां भितल्ली दुस्मानकाय कुशीक दवरून बऱ्यो, लोकांक उपकाराक पडपी सरकारी येवजणी बंद पडच्यो नात हाची जतनाय घेतिल्ली.
दिगंबरबाब आनी प्रधानमंत्री नरेंद्र मोदी हांची इश्टागत अजूनय आसा. गोंय विधानसभेंत जे पयले चार भाजप आमदार पाविल्ले तातूंतलेच एक दिगंबरबाब. तांणी मनार घेतल्यार राजकारणाची चक्रां खिणांत घुवंक लागतलीं, राजकारण्यांक कुशीक दवल्ल्यारसुद्धां देस पावंड्यावेल्या व्हडा उद्येजकांक ते वळखतात.
डाॅ. प्रमोद सावंत राज्य, केंद्र सरकारांतल्या वावराचे, राजकारणाचे वळखींतल्यान, अभ्यासांतल्यान राज्याक योग्य दिका दाखोवंक शकतात. आव्हान आसा वेळाचें बंधन पाळपाचें, सरकारी यंत्रणा जाग्यार घालपाचें. त्या आव्हानाक पाळो दिवपाकय दिगंबरबाब
तांकां अप्रत्यक्षपणान तेंको दितात. खणी परत सुरू करपा खातीर ज्यो अडचणी आसात त्यो पयस करपाकय आदले खणमंत्री मार्गदर्शक कित्याक जावचे न्हय?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
