भांगरभूंय | प्रतिनिधी
पणजीः कदंब महामंडळाच्या कर्मचार्यांच्यो मागण्यो सरकारान मान्य करच्यो म्हूण आयटकाचे क्रिस्तोफर फोन्सेका पणजे श्रमशक्ती भवना भायर उपासाक बसतले. तरी लेगीत मागण्यो मान्य जावंकना जाल्यार १९ मार्चाक संप करपाची शिटकावणी, आयटक आनी कदंब कर्मचार्यांनी दिल्या.
आयटक आनी कदंब कर्मचारी संघटणेन पणजे बस स्टँडार कर्मचार्यांची बसका जाली. हे बसके वेळार हो निर्णय घेतलो.
उपरांत उलयतना फोन्सेका हांणी सांगलें, कर्मचार्यांची थकबाकी, पीएफ दर पयलीं आसलो तसो करप आनी दिसवड्यार कर्मचार्यांक सेवेंत आस्पावन घेवपाची मागणी आमी करतात. ही मागणी पुराय करपा खातीर आमी सरकाराक संप करपाची नोटीस धाडल्या.
जानेवारी २०१६ ते जानेवारी २०१८ मेरेन ३४ म्हयन्यांची उरिल्ली थकबाकी दिवपाक मुख्यमंत्र्यान हयकार दिला. पूण ती आमकां अजून मेळूंक ना. जे निवृत्त जाल्यात तांकां ही थकबाकी रोखडीच दियात आनी उरिल्ले कर्मचारी जे सेवेंत आसात तांकां ती तीन हफ्त्यान दिवपाची आमी मागणी केल्ली, अशें फोन्सेका हांणी सांगलें.
तशेंच आमचो पीएफ पयलीं आसलो तसो करात. डिसेंबर २००९ सावन पीएफ १२ टक्यांवेल्यान १० टक्क्यांचेर हाडिल्लो तो परत बारा टक्क्यांचेर हाडचो. आमी जेन्ना निवृत्त जातात तेन्ना ७ वे वेतन आयोग खाला आमकां सरकार पेन्शन मेळना आनी आमकां फकत देड-दोन हजार पेन्शन मेळटा. म्हारगाय आनी जीण पळोवपाक गेल्यार हें पेन्शन आमकां पावना. देखून १२ टक्के पीएफ सयत तांची थकबाकी दिवन आमची समाजीक सुरक्षा राखची, अशी मागणी फोन्सेका हांणी केली.
कदंब सुमार ३५० कामगार ७ ते १० वर्सा दिसवड्याचेर काम करतात तांकां सेवेंत आस्पावन घेवचें. सरकारान ३ वर्सांनी सेवा केल्ल्या कर्मचार्यांक आस्पावन घेवपा विशींची मागणी मान्य केल्ली. मात ही फायल भोंवत आसा. देखून जे ड्रायव्हर आनी कंडक्टरांनी पांच वर्सां मायज काम केल्यांत तांकां सासणां खातीर आस्पावन घेवचे ना जाल्यार कंत्राटी घेवन तांकां समान पगार दिवचो, अशीय मागणी फोन्सेका हांणी केल्या.
ज्यो लायटीर चलपी बसी आसात थंयसर कदंब महामंडळाचे चालक सासणा खातीर आसपाक जाय. सध्या कंडक्टर आसात, पूण कंत्राटी पद्दतीचेर ह्यो बसी चलोवपाक दिल्यात. हे गजालीचो आमी विरोध करतात आनी ह्यो पुराय बसी कदंबान चलोवपाक जाय. म्हजी बस येवजण लोक, कामगार आनी कदंब विरोधी आनी ती आमकां नाका, अशें फोन्सेका हांणी सांगलें.
कामगार आयुक्ताक जागो करपा खातीर तांकां आमी २७ वेर आंदोलनाची नोटीस धाडिल्ली. पूण आतां १२ दीस जाले आनी हे कामगार खातें न्हिदलां. जनजागृती करून देखून कदंब महामंडळ साल्वार करपा खातीर एक दिसाचें उपोशण करतात, अशें फोन्सेका हांणी म्हणलें.
आमका संप करपाची इत्सा ना. आमकां संप फाटीं घेवपाक लावप हें मुख्यमंत्री, येरादारी मंत्री आनी महामंडळाचे अध्यक्षाचेर निंबून आसा. कदंब महामंडळ, कर्मचारी आनी सामान्य लोकांचे प्रस्न सोडोवन कदंब साल्वार जातली म्हण तांणी पावलां उबारचीं. १९ वेर आमी संपा विशीं नोटीस दिल्या. ह्या दिसा एकूय कदंब बस रस्त्यार धांवची ना. हो संप एक दिसा वा फुडले कितलेशेच दीस चलोवप हाचो निर्णय कर्मचारी घेतले, अशी म्हायती फोन्सेका हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
