भांगरभूंय | प्रतिनिधी
पणजी : उत्तर गोंयच्या विवीध पुलीस स्टेशनांनी आपापले हद्दींत रावपी बिराडकारांची वळक तपासपाची मोहीम (टॅनंट वॅरिफीकेशन कॅम्पेन) चालीक लायल्या. हे फाटभूंयेर मोपा, कोलवाळ, म्हापशें, साळगांव पुलिसांनी मोपाच्या प्रभाग, थिवी रेल्वे स्टेशन वाठारांत, म्हापशें बस स्टॅण्ड तशेंच साळगांवच्या कांय प्रभागांत टेनंट फॉर्माची तपासणी केली. ते भरूंक नाशिल्ल्या बिराडकारांचे कारवाय करतात. कायदो सुवेवस्था राखपा वांगडा गुन्यांवांचो तपास लावप शक्य जावचें, ह्या हेतान ही कारवाय करतात.
गोंय बिराडकार पडताळणी कायदो १ डिसेंबर २०२४ सावन चालीक लागिल्लो. आतां मेरेन सुमार २.०५ लाख घरांची तपासणी पुराय जाल्या. जे घरधनी बिराडकारांची म्हायती आनी कागदपत्रां पुलिसांक दिनात, तांकां १० हजार रूपयां मेरेन दंडाची तरतूद ह्या कायद्यांत आसा. घर धनयांनी बिराडकारांच्या वळखपत्रां सयत गरजेची म्हायती दिल्ल्या अर्जांत भरून लागसारच्या पुलीस स्टेशनांत दिवची, अशी सुचोवणी सरकारान ह्यान पयलींच दिल्या.
राज्यांत वाडपी गुन्यांव आडावपाक गोंय पुलीस तयार जाल्यात. परवांच गिरी बिराडाक रावन उच्च दर्जाच्या हायड्रोफोनीक वीड्सचें उत्पादन घेवपी मूळ बंगळुरूच्या नागरिकाक अटक केली. ताचे कडल्यान सुमार ११ कोटी रुपयां परस चड दराचीं घुवळें वखदां जप्त केलीं. गोंयच्या इतिहासांतली ही सगल्यांत व्हड कारवाय. गोंयांत रावन बेकायदो कामां करप्यांचेर पुलिसांनी खर नदर दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
