भांगरभूंय | प्रतिनिधी
म्हादय विशय सध्या सर्वोच्च न्यायालयांत प्रलंबीत आसा: मुख्यमंत्री
पणजीः म्हादयंतल्यान 3.9 टीएमसी उदक वळोवपा खातीर प्रस्तावीत कळसा-भांडुरा प्रकल्प चालीक लावपाक कंत्राटदाराची नेमणूक केल्या अशें कर्नाटकाचे मुख्यमंत्री सिद्धरामय्या हांणी अर्थसंकल्पांत जाहीर केलां. कर्नाटकाच्या अर्थसंकल्पा विशीं हांव कित्याक उलोवं? अशी प्रतिक्रिया मुख्यमंत्री डॉ. प्रमोद सावंत हांणी दिली.
म्हादयच्या प्रस्ना विशीं गोंय सरकार गंभीर आसा. सध्या हो विशय सर्वोच्च न्यायालयांत प्रलंबीत आसा अशें डॉ. सावंत हांणी सांगलें. मंत्रालयांतल्यान भायर सरतना तांणी ही प्रतिक्रिया दिली.
म्हादय लवादान कर्नाटकाक 3.9 टीएमसी उदक दिलां. लवादाच्या निवाड्याक गोंय, कर्नाटक आनी महाराष्ट्रान आव्हान दिलां. लवादाचो निवाडो अधिसुचीत जाल्ल्यान कर्नाटकान कळसा – भांडुरा प्रकल्पाची येवजण तयार केल्या. केंद्रीय रान आनी पर्यावरण मंत्रालयांतल्यान पर्यावरण दाखलो मेळ्ळ्या उपरांत काम सुरू करतले अशें कर्नाटकान जाहीर केलां. कर्नाटक परवानो मेळोवपाचो यत्न करता तरी ताका आजून परवानो मेळूंक ना. पर्यावरण दाखलो मेळामेरेन कळसा – भांडुरा प्रकल्पाचेर काम सुरू करचे नात अशें कर्नाटकान सर्वोच्च न्यायालयाक आश्वासन दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
