भांगरभूंय | प्रतिनिधी
पणजी : ६१ वी प्रादेशीक डाक अदालत पोस्टमास्टर जनरल, गोंय विभाग, पणजे २० मार्चाक सकाळीं ११ वरांचेर आयोजीत केल्या. गोंय विभागांतल्या फाटल्या स सप्तकांतल्या निराकरण जावंक नाशिल्ल्या टपालसेवां कडेन संबंदीत कागाळी सोडोवप हो ह्या उपक्रमाचो हेतू.
मेल्स, स्पीड पोस्ट, कावंटर सेवा, बचत बँको आनी मनीऑर्डरा वरवीं पयशे पावोवप हे कागाळीचेर डाक अदालत लक्ष दितले. हे विशीं कागाळ आशिल्ल्या गिरायकांनी तांचे कागाळ सहाय्यक संचालक पोस्टल सर्व्हिसेस-१, पोस्टमास्टर जनरल कार्यालय, गोंय क्षेत्र, पणजी ४०३००१ हांगा नक्कल प्रती सयत करच्यो. ज्या अधिकार्यां कडेन मूळ कागाळ केल्ली, तांच्यो तारखो, नांवां आनी पदनाम, तशेंच समस्यांचें संक्षिप्त वर्णन, हांच्या विशिश्ट तपशीलांचो कागाळींत आसपाव आसचो.
निमाणी तारीख १२ मार्च
शक्य तितली बरी सेवा दिवपाचो यत्न करतना, संवादांतलो अंतर आनी सेवा दोश अदींमदीं जाणवतात, जाका लागून कागाळी येवपाक शकतात, हें टपाल विभागाक मान्य आसा. संबंदीत गिरायकांक मेळपा खातीर, तांचे कागाळींचो तपशील एकठांय करपा खातीर आनी शक्य तितले बेगीन तांचें निराकरण करपा खातीर विभागान ह्या डाकअदालतींचें आयोजन केलां. अशे कार्यावळीचें आयोजन करून, गिरायकांक आशिल्ल्या समस्यां कडेन विभाग जतनायेन लक्ष दित आसता, अशें टपाल खात्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
