भांगरभूंय | प्रतिनिधी
मडगांवः दवर्ली वाठारांत नेण्टे चलयेचें अपहरण करपाची घडणूक 7 मार्चाक घडिल्ली. ह्या प्रकरणांत मायणा कुडटरी पुलिसांनी दुबावीत ज्योशुआ बादेडवार (नावेली) हाका कोल्हापूरा अटक केली. पीडीत चलयेचीय सुटका केल्या.
मेळिल्ले म्हायती प्रमाण, दुबावीत ज्योशुआन मारुती देवूळ- दवर्ली वाठारांतल्या १६ वर्सां पिरायेचे चलयेचें अपहरण केल्लें. हे विशीं चलयेच्या आवय-बापायन पुलिशेंत कागाळ केल्ली. ते प्रमाण पुलिसांनी सोद कारवाय सुरू केल्ली. टेक्निकल सर्व्हिलन्साच्या मजतीन पुलिसांक मेळिल्ले म्हायती प्रमाण दुबावीत हो चलये वांगडा कोल्हापूरांत आशिल्ल्याचें कळ्ळें. ते प्रमाण पुलिसांनी एक पंगड कोल्हापूराक धाडून थळाव्या पुलिसांक हे विशीं म्हायती दिली आनी तांचे मजतीन दुबाविताक ताब्यात घेतलो. गोंयांत हाडून चवकशी केल्या उपरांत दुबावित ज्योशुआ आड गोंय बाल संरक्षण कायद्या खाला गुन्यांव नोंद करून ताका अटक केली. ह्या प्रकरणा विशीं पुलीस निरिक्षक अरुण गावस देसाय हांच्या मार्गदर्शना खाला आशुतोष नायक फुडले तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
