भांगरभूंय | प्रतिनिधी
मडगांव : केळशी दर्यादेग वाठारांत भोंवपी विक्रेते हे सुवातेर आयिल्ल्या पर्यटकांक विवीध वस्तू घेवपाक तांचो फाटलाव करतात. हाका लागून पर्यटनाचेर परिणाम जावपाचे आशिल्ल्यान केळशी सरपंच डिक्सन वाझ हांणी कोलवा पुलिशेंत कागाळ नोंद करीत भोंवपी विक्रेत्यांचेर कारवाय करपाची मागणी केली.
केळशी सरंपच डिक्सन वाझ हांणी दर्यादेग वाठारांत पंचायतीन नेमिल्ल्या सुरक्षारक्षका सयत कोलवा पुलीस स्टेशनांत वचून कागाळ नोंद केली. दर्यादेग वाठारांत भोंवपी स विक्रेत्यांक पिंक फोर्साक आपोवन पुलीस स्टेशनांत हाडलीं.
कागाळ दिले उपरांत वाझ हांणी सांगलें, कोलवा पुलिसांच्या सहकार्यांतल्यान आनी पंचायतीन सुरक्षा रक्षक नेमून दर्यादेग वाठारांतल्या भोंवपी विक्रेत्यांचेर दोन म्हयन्यां आदीं कारवाय केल्ली. आतां परत शॅक्सांत वचून, विसव घेवपी पर्यटकांक त्रास दिवन वस्तू विक्री करपाचो यत्न हे भोंवपी विक्रेते करतात. हाचे व्हिडिओ आनी फोटो पुलिसांक दिल्यात. भोंवपी विक्रेत्यांक लागून उत्तर गोंयच्या दर्यादेग वाठारांत पर्यटकांक त्रास जाल्ल्याचें दिसून येता. हीच स्थिती दक्षीण गोंयांत जावची न्हय म्हणून यत्न करतात. टिशर्ट, माळ आनी हेर वस्तूंचे विक्रे खातीर हे वेवसायीक पर्यटकांच्या फाटल्यान लागतात. तांकां सतायतात. ह्या सगल्या प्रकाराचो बंदोबस्त जावपाक जाय.
मजगतीं, भोंवपी विक्रेत्यांचेर कारवाये खातीर केळशी पंचायती प्रमाण दर्यादेग वाठारांतल्या हेर पंचायतींनी खर भुमिका घेवची, असोय उलो मारला.
हेडग्या सुण्यांचोय त्रास
हे सुवातेर हेडग्या सुण्यांचोय पर्यटकांक तशेंच थळाव्यांक त्रास सोंसचो पडटा. राज्य सरकारान हाचेर लक्ष दिवपाची गरज आसा, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
