भांगरभूंय | प्रतिनिधी
दिवचल : बायलांनी आपल्या भुरग्यांचो फुडार काळखी जावचो न्हय, म्हूण घरांत साक्षरतायेचो दिवो पेटयलो. इतिहासा कडेन पळयल्यार हें कळटलें. दरेके बायलेन आपलें सामान्य गिन्यान वाडोवन समाजांत वावुरपाची गरज आसा. ते खातीर निरोगी जीण जगपाक भलायकेची जतनाय घेवपाक जाय. आमी निरोगी आसल्यार कुटुंबा कडेन चड लक्ष दिवपाक शकता, अशें मुख्यमंत्री डाॅ. प्रमोद सावंत हांणी सांगलें.
सांखळेचें रवींद्र भवन आनी पद्मिनी फावंडेशन हांच्या जोड पालवान महिला दिसा निमतान आयोजित केल्ले ‘उत्सव स्त्रीच्या अस्तित्वाचा’ हे कार्यावळींत ते उलयताले. रवींद्र भवनांत जाल्ले हे कार्यावळीक ते मुखेल सोयरे म्हूण हाजीर आशिल्ले.
कांय भुरगीं आपल्या जाण्ट्या आवय- बापाय कडेन लक्ष दिनात, अशें कळटा. ताका लागून जाण्ट्यांनी आपले भलायकेची जतनाय घेवची. बायलां खातीर खूब समाजीक येवजण्यो आसात, तांचो लाव घेवचो, अशें डाॅ. सावंत हांणी सांगलें. सरकारी म्हामंडळांनी काम करपी सुरक्षा रक्षक, सफाई कामगारांक विविध सरकारी येवजण्यो मेळटल्यो, अशेंय तांणी जाहीर केलें.
ह्या वेळार फावंडेशनाची अध्यक्ष सुलक्षणा सावंत, पाळी जिल्हो पंचायत वांगडी गोपाळ सुर्लकार, मंडळाचे अध्यक्ष रामा नायक, दत्ताराम चिमुलकर, स्नेहा देसाय, मतदारसंघातले सरपंच गौरवी नायक, साहिमा गावडे, सपना पार्सेंकार, सागर फडते, बाबला मळीक आनी हेर मानेस्त हाजीर आशिल्ले.
ह्या वेळार टाकावू पसून टिकावू, केशभूशा, भारतीय व्हंकल, नाच सर्ती घेतल्यो. सुलक्षणा सावंत हांणी येवकार दिलो. सुत्रसंचालन वर्षा मळीक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
