थिवे बंगल्यात उजो लागून सुमार 2 लाखांचें लुकसाण
भांगरभूंय | प्रतिनिधी
म्हापशें, प्रतिनिधी ः माडेल, थिवे शुभ इन्कलिव्ह कॉम्प्लेक्सांतल्या एडविन परेरा हांच्या बंगल्यांत उजो लागून सुमार 2 लाखांचें लुकसाण जालें. म्हापशें उजो पालोवपी दळाच्या जवानांनी उजो नियंत्रणांत हाडलो.
8 तारखेर शेनवारा सकाळीं सुमार 10.40 वरांचेर ही घडणूक घडली. परेरा दोन दिसां आदीं बंगलो बंद करून मुंबय गेल्ले. व्हीलांतली वीज पुरवण चालू आशिल्ल्यान एका फ्रिजांत शॉर्ट सर्किट जावन उजो लागलो. उज्याक लागून बंगलांतले दोन फ्रिज आनी हेर घरगुती वस्तूं मेळून वट्ट 2 लाख रुपया लुकसाण जालें.
बंगलांतल्यान धुंवर येता ते शेजाऱ्यांक दिसलें तेन्ना तांणी उजो पालोवपी दळाक फोन केलो आनी म्हायती दिली. म्हापशें उजो पालोवपी दळाचे हवालदार विष्णु गावस, गोविंद देसाय, अक्षय सावंत, रिचर्ड त्रिनिदाद, दीप्तेश गावडे आनी आकाश कळंगुटकार हांणी घडणूक सुवातेर येवन उजो नियंत्रणांत हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
