भांगरभूंय | प्रतिनिधी
16 वेर रोमटामेळ, चित्ररथ मिरवणूक: लोकनाच, फॅन्सीड्रेस सर्त आयोजीत
मडगांवः मडगांव शिमगोत्सव समिती मडगांव पालिका आनी पर्यटन खात्याच्या सहकार्यान 16 मार्चाक होली स्पिरिट इगर्जे सावन मडगांव पालिका चौक मेरेनच्या मार्गाचेर चित्ररथ आनी रोमटामेळ मिरवणूक काडटले. 10 तारखेक सकाळीं श्री देव दामोदराक श्रीफळ अर्पण करुन शिमगोत्सवाची सुरवात जातली आनी सांजवेळार सत्यनारायणाची पुजा जातली अशी म्हायती समितीचे उपाध्यक्ष आमदार उल्हास तुयेकार हांणी दिली.
मडगांव शिमगोत्सव समितीची पत्रकार परिशद मालभाटांतल्या शिमगोत्सव समितीच्या कार्यालयांत जाली. ह्या वेळार उपाध्यक्ष उल्हास तुयेकार, भंडारी आनी नगराध्यक्ष दामोदर शिरोडकार, जिल्लो पंचायत वांगडी परेश नायक, उपनगराध्यक्ष बबिता नायक आनी हेर हाजीर आशिल्ले. ह्या वेळार तुयेकार हांणी सांगलें, फाटलीं 38 वर्सां मडगांव शिमगोत्सव समिती मडगांवांत शिमगोत्सव मनयता. 16 मार्चाक चित्ररथ मिरवणूक जातली. ताचे आदीं सोमारा 10 तारखेक सकाळीं 10:30 वरांचेर पिंपळपार हांगा श्री देव दामोदराक श्रीफळ अर्पण करून शिमग्याची सुरवात जातली. उपरांत सांजवेळार शिमगोत्सव समिती कार्यालयांत सत्यनारायण महापूज जातली, तातूंत नगरसेवक दामोदर वरक येजमान आसतले.
12 मार्चाक सांजवेळार देव जागेश्वर राखणदार हांगा सुर आनी रोट सादर जातले. मडगांवांत जावपी शिमगोत्सवांत गोंयची संस्कृताय दाखोवपाचो यत्न आसतलो. ह्या कार्यावळींत मुख्यमंत्री डॉ. प्रमोद सावंत, पर्यटन मंत्री रोहन खंवटे, आमदार दिगंबर कामत, गोंय भाजपा अध्यक्ष दामू नायक, आमदार विजय सरदेसाय, आमदार आलेक्स रेजिनाल्ड आदीं हाजीर आसतले.
नगराध्यक्ष शिरोडकार हांणी सांगलें, रोमटामेळ, लोकनाच आनी चित्ररथां खातीर राज्य सरकारान दिल्ल्या इनामां मदीं समिती कडल्यान कांय प्रमाणांत रक्कम जोडून इनामांचे पयशे वाडयला. रोमटामेळआनी चित्ररथा खातीर सरकार 75 हजार रुपया दिता, जाल्यार समितीन तातूंत 25 हजार रुपया घालून एक लाख रुपया इनाम केलां. लोकनाच सर्ती खातीर सरकारान 25 हजार रुपया दिल्ले, समितीन 15 हजार घालून इनामाचे पयशे 40 हजार केल्यात. हाचे भायर दोन गटांनी – कनिश्ट आनी वरिश्ठ – फॅन्सी ड्रेस सर्त जातली. दनपारां अडेच वरांचेर शिमगोत्सव समिती कडल्यान फॅन्सी ड्रेस सर्त सुरू जातली. प्लॅटफॉर्माचेर देव दामोदराची पुजा केल्या उपरांत होली स्पिरिट इगर्जें सावन रोमटामेळ आनी चित्ररथ मिरवणूक सुरू जातली अशेंय शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
