भांगरभूंय | प्रतिनिधी
अमृतसर, खबरां संस्था ः आंतरराश्ट्रीय शिमे लागसार भारतांतल्यान पाकिस्तानाक वचपी अटारी रेल्वेस्टेशना लागसार हँड ग्रेनेड मेळ्ळा. हे घडणुके उपरांत सुरक्षा दळ सादूर जाल्यात. तेच बरोबर पुलिसांनी बॉम्ब जप्त करून तपास सुरू केला. म्हत्वाचें म्हणल्यार 2019 वर्सा सावन पाकिस्तानाक वचपी समझोता ट्रेन बंद जाल्या.
रोडावली ह्या शिमेवयल्या गांवालागीं हो ग्रेनेड मेळ्ळो. पाकिस्तानाची शिमा ह्या सुवाते सावन थोड्याच अंतराचेर आसा. जप्त केल्लो हँड ग्रेनेड सामको पोरणो आशिल्ल्याचें प्रथमीक तपासात दिसून आयलां, पूण ताची नेमकी स्थिती आनी धोक्याची पातळी तपासप सुरू आसा.
ग्रेनेड मेळ्ळ्या उपरांत पुलीस आनी बॉम्ब निकामी पंगडान थंय पावून परिस्थितीचो नियाळ घेतलो. हो बॉम्ब कितलो पोरणो आनी हांगा कसो पावलो हाची चवकशी चालू आसा.
रेल्वेमार्ग बंद, सुरक्षा यंत्रणांचो हुस्को वाडलो
भारत आनी पाकिस्तान हांचे मदलो वेपार बंद जाल्ल्यान हो रेल्वे मार्ग बरोच तेंप बंद आसा. अशे परिस्थितींत ह्या वाठारांत ग्रेनेडांची उपस्थिती चिंतेची गजाल जाल्या. ग्रेनेड हांगा कसो पावलो आनी खंयच्या हेतून उडयलो हाची चवकशी पुलीस आनी सुरक्षा एजन्सी करतात.
ह्या हँड ग्रेनेडाची निर्मिती आनी वर्स कळ्ळ्या उपरांतच सगळे स्पश्ट जातलें. हे घडणुके उपरांत रेल्वेमार्ग आनी भोंवतणच्या वाठाराची पुराय चवकशी चालू आसा. ताका लागून थंय हेर दुबावीत वस्तू नात हाची खात्री करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
