भांगरभूंय | प्रतिनिधी
कांय बायलो ओगी रावन काम करतात. तांकां प्रसिद्धी मेळना. तांचे कडल्यान तुमी खूब कितें शिकूं शकतात. एके बायलेक मजत करप म्हणल्यार ताचो लाव दोन घरांक जाता.
महिला दीस आमी व्हड दबाज्यान ८ मार्चाक मनयतात. हाचें फाटलें कारण म्हणल्यार बायलांचेर चेपण आयलें. ह्यो गजाली संवसारान जाल्यो तश्यो भारतांतूय जाल्यो. ह्या दिसा भारतीय स्वातंत्र्य संग्रामांतल्यो एक महिला सरोजिनी नायडू हांचो वाडदीस येता. आपल्या वाठारान कदाचित तांचे इतली शिकलेली बायल नासत, पूण तिचे सारके गुण आसात की नात हें वळखप म्हत्वाचे. संवसारांत घडपी गजाली आमी घरांत पसून पळोवपाक शकतात. मात आमी तातूंतल्यान कितें शिकले, जाल्यारुच ताका म्हत्व आसा. एखादी बायल आपल्या हक्कां खातीर जर झगडटा, तर तिका तितलें गिन्यान आसपाक जाय. तें तुमी अभ्यास करून मेळोवपाक शकतात. पूण चड अभ्यास करपाची मानसिकताय आसपाक जाय. ती कशी येतली?
महिला दीस हो कितेंतरी नवें शिकपा खातीर जर आमी वापरलो तर आमचें जिणें आसा ते परस बरें जातलें, हातून दुबाव ना. हो वावर तुमी नोकरी सांबाळून करूं शकतात, घरा बसून लेगीत करूं शकतात, पूण हाका तुमची इत्साशक्त, मानसिकताय बरी जाय. आतां गोंयांनूच मंगळसूत्रां काडून फुज्जो मारपाचे प्रसंग जाय ते घडटात. पुलिसांक दोश दिवन कांय उपेग ना. ह्या गजालींचो बारकायेन अभ्यास केलो तर कांय प्रस्न पडटात. तुमी वळख नाशिल्ल्या मनशा कडेन कशीं उलयतात? आतां मोबायल आसताना एखाद्याचो पत्तो कोण विचारीत? हे प्रस्न मनांत जर येत तर म्हाका दिसता असले प्रकार उणें जावं शकतात. सगलेच काय वाचूंक वतात अशें ना, पूण जांणी कोणीं वाचला तीं दुसऱ्यांक सांगूंक शकतात.
प्रत्येक गांवांत एक तरी देवूळ आसता. थंय गांवच्या बायलांक आपोवन तांकां मार्गदर्शन दिवं येता. नाजाल्यार शाळेन आपापलीं भुरगीं पावयतकच गजाली मारचे परस वाचिल्लें कितें एकमेकांक सांगूं येता. दुसऱ्याक जागृत करूं येता. असल्या कामाक पयशे पडनात. हें काम फुकट, वेळ वगडायनासतना जावं येता. आमचे कडेन जायत्यो बायलो आसात. सगल्योच कितें राजकी फुडाऱ्यांच्या तालार नाचनात. कांय बायलो ओगी रावन काम करतात. तांकां प्रसिद्धी मेळना. तांचे कडल्यान तुमी खूब कितें शिकूं शकतात. एके बायलेक मजत करप म्हणल्यार ताचो लाव दोन घरांक जाता. तिच्या घरा आनी कुळाराच्या घरा.
कांय राज्यांनी चलयो शाळेंत वचनाशिल्ल्यो. कारण थंय मुतारेची सुविधा नासली. आमी महिला दीस मनयतात. ताची सुरवात मुतारेचे वेवस्थेन करपाक जाय. मागीर ती शाळांनी जावं वा हेर भौशीक जाग्याचेर. महिला दीस म्हणल्या एक दीस बायलांचें गुणगान करप न्हय, तर सगल्या दिसा तांच्यो गरजो पूर्ण करप. गोंयांत बायलां खातीर बरी वेवस्था, सुविधा आसल्यो तरी तांचे सुरक्षेचो प्रस्न आसा. तें काम आमीच करपाक जाय. सातां उपरांत ती भियेनासतना भोंवपाक वचपाक जाय, इतलें सुरक्षीत वातावरण आमी तिचे खातीर निर्माण करपाक जाय. रोमानिया देशांत आवयचो दीस मनयतात. गोंयांत लेगीत कांय शाळांनी तो जाता. आयज बायल मनीस सगल्या वाठारांनी दिसता. मागीर तें ड्रायव्हींग आसूं वा पुलिशेंत. बायलां कडेन उपजत गुण आसात, ते म्हणल्यार संयम, मोग, आपुलकी. ह्या गुणांक लागून आमी तांची तुस्त करतात. शिवाजी हे महाराज जावंक पावले, तातूंत तांची आवय जिजाबाईचें खूब व्हडलें योगदान आसा. साने गुरुजीक घडोवपीय ताची आवयूच. कितलींशीच उदाहरणां आसतलीं. आवयचो आनी आमचो चड संबंद येता. तेन्ना आयच्या दिसाच न्हय, तर सगल्या दिसांनी हें मतींत दवरून बायलांक मान दिवपाक आमी विसरुया नाका.
प्रा रामदास केळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
