भांगरभूंय | प्रतिनिधी
पणजी : समाजांत दादलो- बायल समानताय हाडपाक पयलीं लोकांची मानसिकताय बदलपाची गरज आसा, अशें मत बायलां आनी बालकल्याण मंत्री विश्वजीत राणे हांणी उक्तायलें. शुक्रारा आयोजीत ’बेटी बचाओ बेटी पढाओ’ कार्यावळीचें धावें वर्स पुराय जाल्ले निमतान आयोजीत कार्यावळींत ते उलयताले. ह्या वेळार राज्यपाल पी एस श्रीधरन पिल्लई, जिल्लोधिकारी डॉ. स्नेहा गिते, संचालक मान्यूएल बार्रेटो, सचीव अरुण कुमार मिश्रा आनी हेर हाजीर आशिल्ले.
प्रधानमंत्री नरेंद्र मोदी हांणी १० वर्सां आदीं दादलो- बायल समानता हाडपा खातीर ‘बेटी बचाओ बेटी पढाओ’ ही कार्यावळ सुरू केल्ली. तेन्ना देशांतलें लिंग गुणोत्तर उणें जाता. फाटल्या धा वर्सांनी हातूंत वाड जाल्या. तशेंच बायलांच्या शिक्षण घेवपाच्या प्रमाणांतूय वाड जाल्या. गोंयांत २०१५ त लिंग गुणोत्तर दर हजार दादल्यां फाटल्यान ९३३ बायलो आशिल्ल्यो. २०२५ त तें वाडून दर हजार दादल्यां फाटल्यान ९७७ बायलो जाल्यात. अशें जरी आसलें तरी आमकां हे विशीं आनीक उदरगत करपाची गरज आसा, अशें मंत्री राणे हांणी म्हणलें.
बायलां आनी बालकल्याण खात्याचे कर्मचारी सेगीत विंगड विंगड पांवड्यांवेल्या बायलां मदीं बोवाळटात. हाका लागून बायलां विशीं समाजाची मानसिकताय बदलपाच्या कामांत खात्याची भुमिकाय गरजेची. गोंय हें ल्हान राज्य आशिल्ल्यान घराघरांनी वचून हे विशीं समुपदेशन करपूय गरजेचें. आयज खात्या वतीन अंगणवाडी सेविकांच्या भुरग्यांचो सन्मान केलो. हातूंतलें एक दोतोर, एक वकील तर एक अभियंता जाल्या. अशीं उदाहरणां लोकां मेरेन पावल्यार ताकां उबार मेळपाक शकता.
चलयेचो जल्म जाले उपरांत एकूय फोन येवंक ना
तांणी मुखार म्हणलें, २१ वर्सां आदीं म्हजे धुवेचो जल्म जालो. तेन्ना म्हाका परबीं दिवपा खातीर एकूय फोन येवंक ना. कांय फोन आयले, तांणी म्हाका बेजार जावं नाका अशें सांगलें. तेन्ना हांवें तांकां आपूण बायल- दादलो असो भेदभाव करिनात अशें सांगिल्लें.
राज्यपाल पिल्लई हांणी सांगलें, भारतीय संस्कृतीत नारीशक्ती ही कल्पना आदीं सावनूच आसा. नवरात्रींत देवी दुर्गेची पुजा करता. उल्लाल हांगा अबक्का राणयेन पुर्तुगेजांक तीन फावटीं हारयलें. हाचो इतिहास आमकां खबर आसपाक जाय. कांय सुटके झुजार्यांनी स्वतंत्र भारतांत दादलो बाय समानताय आसतली, बायलांचेर अत्याचार जावचे नात अशी अपेक्षा केल्ली. मात स्वातंत्र्या उपरांत कितें ना कितें कारणांक लागून हे विचार फाटीं पडत गेले. फाटल्या धा वर्सांनी ‘बेटी बचाओ बेटी पढाओ’ ह्या अभियानाक लागून आमचे मदीं ल्हव ल्हव सुदारणां जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
