भांगरभूंय | प्रतिनिधी
पणजी ः दोन दिसां आदीं बेपत्ता जाल्ले चलयेचें तिच्या घरां पसून २५ मीटर अंतराचेर रावपी मुळ मिरज शारांतल्या एका जोडप्यान अपहरण करुन तिचो खून केलो. काल उसगांवां घडिल्ले हें घडणुकीन लोकां मदीं तिडकीचें ल्हार पातळ्ळ्या. चली बेपत्ता आसा अशी कागाळ आयले उपरांत पुलिसांनी चवकशी करपाक सुरवात केली.
काल सांजवेळार परतून पुलीस चवकशी खातीर घडणुकेच्या थळार आयले तेन्ना जोडप्याची वागणूक दुबावीत दिसली. पुलिसांनी तांची खोलायेन चवकशी केली तेन्ना तांणी आपलो गुन्यांव कबूल केलो. विशेश म्हणल्यार आदल्या दिसा दोगांयनी पुलिसां वांगडा मेळून चलयेक सोदपाचें नाटक केल्लें. पुलिसांनी रातीं उसरां फॉरेन्सिक पंगडाचे हाजिरेंत चलयेची कूड भायर काडली.
तिच्या नाका आनी तोंडांत उदक गेल्ल्यान घुसमुटून तिका मरण आयिल्ल्याचो अदमास आसा. ह्या दुबावित जोडप्यान 25 वर्सां उपरांत लेगीत भुरगे जावंक नाशिल्ल्यान निराशेन शेजाऱ्याचे चलयेचें अपहरण करून तिचो खून केलो. ही घडणूक ‘काळ्या जादवा’चें प्रकरण आशिल्ल्याचें उक्तें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
