भांगरभूंय | प्रतिनिधी
सांखळे : सांखळेच्या रवींद्र भवनांत आयज रोजगार मेळावो आयोजीत करतले. राज्यांतल्या विवीध उद्देजीक मळार जायत्यो नोकर्यो आसात. विवीध कंपनीं सरकारच्या इंटर्नशीप येवजणे खाला बर्यो नोकर्यो दितात, तरणाट्यांनी ह्यो संदी घेवप गरजेचें, अशें मुख्यमंत्री डॉ. प्रमोद सावंत हांणी सांगलें.
‘शिकात आनी जोडात’ ह्या तत्वाचेर आदारीत ह्या नोकर्यांत उण्यांत उणो १५,००० ते २०,००० रुपयां मेरेन पगार दितात. पात्र आनी इत्सूक उमेदवारांनी वेळ वगडायनासतना हे संदींचो फायदो घेवप गरजेचें, अशेंय तांणी म्हणलें.
मजगतीं, ह्या वेळार तांणी आनीक एक म्हत्वाची गजाल सांगली. ह्यान फुडें सरकारी नोकर्यां खातीर खाजगी अणभव प्रमाणपत्र गरजेचें आसतलें. अणभव प्रमाणपत्र नासल्यार सरकारी नोकर्यां खातीर संबंधितांचो विचार करचेना. सरकाराच्या इंटर्नशिप येवजणे खाला उपलब्ध आशिल्ल्या विवीध मळांवेल्या नोकर्यां खातीर तरणाट्यांनी अर्ज करचे आनी अणभव घेवचे अशें तांणी सांगलें.
इंटर्नशिप : तरणाट्यांनी अणभव घेवचो: मुख्यमंत्री
फाटींच पर्वरे गोंय मुळावें आनी उच्च माध्यमीक शिक्षण मंडळाच्या नवे इमारतीच्या उक्तावणा वेळार मुख्यमंत्र्यांनी उलयतना आनीक एक म्हत्वाची गजाल नमूद केल्ली. आयटीआय पांवड्यार विवीध कुशळटायेचे अभ्यासक्रम सुरू केल्यात. दोन वर्सांच्या आयटीआय अभ्यासक्रमाक लागून एसएससी वा एचएसएससी परीक्षेंत नापास जाल्ल्या विद्यार्थ्यांक कांय सरकारी नोकर्यो मेळोवपा खातीर समान म्हत्व मेळटलें, अशी आस्त तांणी उक्तायल्ली.
तेन्नाय मुख्यमंत्र्यांनी सरकारी नोकरी मेळोवपा खातीर, एक वर्साचो अप्रेंटिसशीप वा एक वर्साचो अणभव गरजेचो आशिल्ल्याचें म्हणिल्लें. जे विद्यार्थी एसएससींत नापास जातात तांणी बेजार जावचें न्हय. जर तांणी आयटीआयंत एका वर्साचो अभ्यासक्रम पुराय केल्यार तो एसएससीच्या समान मानतले आनी २ वर्सांचो आयटीआय अभ्यासक्रम पुराय करप्यांक एचएसएससी पास मानतले. हीं प्रमाणपत्रां सरकारी नोकर्यां खातीर वैध आसतलीं. हे खातीर भरती नेमांनी एसएससी वा एचएसएससी ही उण्यात उणी पात्रताय म्हणून नमूद करतले, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
