भांगरभूंय | प्रतिनिधी
खबरां संस्था ः संवसारीक शांतताये खातीर मोलादीक योगदान दिल्ल्या व्यक्तींक आनी संघटनांक शांततायेचो नोबॅल पुरस्कार दितात. मजगतीं, अंदूं हो पुरस्कार कोणाक मेळटलो हाची उमेद आसा. नॉर्वेजीयन नोबेल इन्स्टिट्यूटान ह्या वर्साच्या नोबेल पुरस्कारा खातीर 300 परस चड व्यक्तींक आनी संस्थांक नामांकीत केल्ल्याचें जाहीर केलां. एएफपीन ही म्हायती दिल्या. विशेश म्हणल्यार तातूंत अमेरिकेचे अध्यक्ष डोनाल्ड ट्रम्प, पोप फ्रान्सिस आनी नाटोचे आदले सेक्रेटरी जेन्स स्टॉल्टनबर्ग हांचीं नांवां आसात.
वट्ट 338 नामांकनां दाखल जाल्यांत, तातूंत 244 व्यक्ती आनी 94 संस्था आसात. फाटल्या वर्सांच्या 286 लोकां परस हो आंकडो खूब चड आसा. मजगतीं, आंतां मेरेन 2016 वर्सा विक्रमी 376 नामांकनां दाखल जाल्ली.
खंयचीं नांवां चर्चेत?
नॉर्वेजीयन कायदो मंडळाच्या वांगड्यांनी थळाव्या माध्यमांक सांगलें, स्टॉल्टेनबर्ग, यूएन सेक्रेटरी जनरल अॅन्टोनियो गुटेरस आनी पोप फ्रान्सिस हांचीं नांवा शांतताय पुरस्कारा नांमाकित केल्यात. गाझा, युक्रेन सारक्या झुजान त्रासांत आशिल्ल्या प्रदेशांनी पोप फ्रान्सिस शांतताय हाडपा खातीर आवाज काडटालो.
दुसरे वटेन फ्रेंच कार्यकर्ते गिसेल पेलिकॉट हांकां हो पुरस्कार मेळचो अशी मागणी जाता. यूकेतल्या हजारांनी लोकांनी जानेवारींत ह्या याचिकेचेर सय केल्ल्यो. आदल्या घोवान केल्ल्या लैंगीक हिंसाचाराचेर उलोवपाचें धैर्य आनी उक्तेपण पळोवन पेलिकॉट नांव चर्चेत आयलें.
शांततायेचो नोबॅल पुरस्कार नॉर्वेजीयन नोबेल समिती दिता. ह्या पुरस्कार विजेत्यांची घोशणा ऑक्टोबरांत जाता. फाटल्या वर्सा हो पुरस्कार जपानी अणुबॉम्ब स्फोटांतल्यान वाटायल्ल्या गट निहोन हिडानक्यो ह्या पंगडाक दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
