भांगरभूंय | प्रतिनिधी
पर्वरे जलशुद्धीकरण प्रकल्पाचेर परिणाम
म्हापशें: तिस्क- पर्वरे (पोरणो बाजार) हांगासरल्या सुकूर- सांगोल्डें जंक्शनार भुंयगत वीज वाहिनी खणपा वेळार जलवाहिनी फोडली. पर्वरे जलशुद्धीकरण प्रकल्पाक ही फुटिल्ली जलवाहिनी कच्च्या उदकाची पुरवण करताली. हाका लागून ह्या प्रकल्पाचेर परिणाम जाला.
ही घडणूक आयज (बिरेस्तारा) दनपारां दोन वरांच्या सुमाराक घडली. तिस्क पर्वरे हांगासरल्या सुकूर सांगोल्डें जंक्शना कुशीक सांगोल्डेंचे वटेन वीज खात्या वतीन भुंयगत वीजवाहिनी घालपाचें काम सुरू आसा.
ह्या खणपाच्या कामा वेळार जेसीबी कडल्यान जलवाहिनी फुटली. ही मुखेल जलवाहिनी आशिल्ल्यान वाहिनींतल्यान उदकाचो मोटो फवारो उडलो. 20 ते 30 मिटरा मेरेन ही उडिल्ल्या फवाऱ्याचें अंतर आशिल्लें. हे घडणुकेची खबर मेळटकच उदका पुरवण विभागान अस्नोडें जलशुद्धीकरण प्रकल्पा पसून पर्वरे उदका पुरवण दिवपी सगल्या जलवाहिन्यांचें उदक बंद केलें.
पूण तरी लेगीत जलवाहिनीचें उदक उणें जावंक नाशिल्ल्यान ही वाहिनी उदका स्रोत खात्याची आशिल्ल्याचें स्पश्ट जालें. उपरांत उदका स्रोत खात्यान जलवाहिनीचें उदक खंडीत केलें. तो मेरेन दोन वरां जावन गेलीं. ताका लागून लाखांनी लिटरांच्या उदकाचें लुकसाण जालें.
मजगतीं, ही तिलारी धरणाच्या कानालाची उदकावाहिनी थेट गिरी हांगासरल्या पर्वरे जलशुद्धीकरण प्रकल्पाक जोडल्या. ह्या जलवाहिनी वरवीं पर्वरे जलशुद्धीकरण प्रकल्पाक कच्च्या उदकाची पुरवण जाता. जलवाहिनी फोडिल्ल्यान ह्या प्रकल्पाच्या उदक शुद्धीकरण प्रक्रियेचेर परिणाम जाला. जलवाहिनींतल्या उदकाचो विसर्ग जाले उपरांत सांजवेळा दुरुस्तीचें काम उदका स्रोत खातें हातांत घेतलें. हें दुरुस्तीचें काम शुक्रारा फांतोडेर मेरेन पुराय जावपाची शक्यताय आसून तो मेरेन पर्वरे जलशुद्धीकरण प्रकल्पाचेर निंबून आशिल्ल्या वाठाराक उदकाचे समस्येक तोंड दिवचें पडटलें.
फाटल्या शेनवारा 1 मार्च दिसा मोंतेगिरी हांगा भुंयगत वीज वाहिनीच्या कामा वेळार जलवाहिनी फोडिल्ली. उपरांत आतां पांच दिसां उपरांत परतून तिस्क- पर्वरे सांगोल्डेंचे वटेन मुखेल जलवाहिनी फोडली. मोंतेगिरी ते तिस्क जंक्शन हें दोन किलोमिटराचें अंतर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
