भांगरभूंय | प्रतिनिधी
पत्रकारां कडेन उलयतना मुख्यमंत्र्यांची म्हायती
पणजी: श्रीदेव खाप्रेश्वर देवळाची नवी समिती फुडल्या दोन दिसांत प्रसाद घेवन देवळा खातीर नवी सुवात सोदतली. एकदां तांची सुवात थारले उपरांत दुसऱ्या दिसा सरकारा वतीन देवळाचें बांदकाम सुरू करतले. नवें देवूळ पयलीं भशेनूच पूण भव्य आसतलें अशी म्हायती मुख्यमंत्री डॉ. प्रमोद सावंत हांणी दिली. बिरेस्तारा तांणी पत्रकारां कडेन संवाद सादलो.
डॉ. प्रमोद सावंत हांणी मुखार म्हणलें, देवळाचे हाचे पयलींचे समितीक खाप्रेश्वराचें देवूळ हेर सुवातेंत बांदतले हाची कल्पना दिल्ली. हाका तांणी संमती लेगीत दिल्ली. तांकां आमी हाचे पयलींच नवी सुवात सोदपाक सांगिल्लें. पूण पोरणे समितीन निमाणें मेरेन नवी सुवात सुचयली ना. उपरांत कांय दिसां पयलीं नवे समितीन म्हजी भेट घेतली. तांणी आमी प्रसाद घेवन नवी सुवात सोदतले अशें सांगलां.
मुख्यमंत्र्यांनी म्हणलें, फुडल्या दोन दिसांत नवी सुवात सोदतले. उपरांत रोखडीच देवळाच्या बांदकामाची सुरवात जातली. नवे सुवातेंत आतां परस भव्य अशें देवूळ बांदतले. पोरण्या देवळा कुशीक आशिल्लो वडष पयलींच दुसरे सुवातेर लायला. ताका लागून तो परतून थंयच्यान काडून नव्या देवळाचे सुवातेंत लावप योग्य न्हय. हे खातीर नव्या देवळांत एक ते दोन वर्सांच्या वडाचें नवें झाड लावपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
