भांगरभूंय | प्रतिनिधी
प्रकरणाची सीबीआय चवकशी जावची : कवठणकाराचें पत्र
पणजी : आदल्या मंत्र्यान सध्याच्या मंत्र्याक पयशे दिवपाचें प्रकरण गंभीर आशिल्ल्यान ताची सीबीआय वतीन चवकशी करपाची मागणी प्रदेश कॉंग्रेसचे उपाध्यक्ष सुनील कवठणकार हांणी केली. राज्यपालान हस्तक्षेप करून सरकाराक चवकशेचे निर्देश दिवचे, अशी मागणी करपी पत्र सुनील कवठणकार हांणी राज्यपाल पी. एस. श्रीधरन पिल्लई हांकां धाडलां
पीए वरवीं मंत्र्याक १५ ते २० लाख रूपया लाच दिल्ल्याचो आरोप आदले मंत्री पांडुरंग मडकयकार हांणी मंगळारा केल्लो. तांच्या ह्या आरोपाक लागून सरकारा सयत राज्यांत बोवाळ जालो. मडकयकरान पयशे दिल्ल्या मंत्र्यांचें नांव सांगचें, अशी मागणी सहकारी मंत्री करतात. मुख्यमंत्री डॉ. सावंत हांणीय मडकयकार हांणी नांव सांगून आरोप सिद्ध करचे, असो उलो मारला.
विरोधी पक्षा सयत सामान्य नागरिकूय चवकशेची मागणी करतात. हे फाटभूंयेर कॉंग्रेसीचे उपाध्यक्ष सुनील कवठणकार हांणी राज्यपालांक पत्र धाडून सीबीआय चवकशेची मागणी केल्या. भारतीय न्याय संहिता २०२३ आनी भ्रश्टाचार प्रतिबंधक कायदो १९८८च्या आदारार राज्यपालान हस्तक्षेप करून चवकशेचे आदेश दिवचे. निपक्ष चवकशे खातीर सीबीआय वतीन चवकशी जावप योग्य थारतलें. लोकशायेंत भ्रश्टाचार आसचो न्हय. हाचे खातीर आरोपांची चवकशी जावपाक जाय, अशें कवठणकार हांणी पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
