भांगरभूंय | प्रतिनिधी
पणजी, प्रतिनिधी : प्रधानमंत्री स्वनिधी येवजणे खाला 1302 जाण फुडले पांवड्यावेले रीण घेवपांक पात्र थारल्यात. तांतूतले 804 जाणांक दुसऱ्या पांवड्यार जाल्यार 331 जाणांक तिसऱ्या पांवड्यार रीण मेळ्ळां, अशी म्हायती गोंय शार उदरगत संस्थेन (जीसुडा) दिल्या.
कोविड काळा उपरांत रस्तावेल्या विक्रेकारांक अर्थीक फाटबळ दिवन तांका सक्षम करपा खातीर प्रधानमंत्री स्वनिधी येवजणे खाला सुमार देड हजार गोंयकारांनी हाचो लाव घेतला. तीन पांवड्यांनी रीण घेवपाची तरतुद आसा. पयले खेपे 10 हजार मेरेन रीण घेवपाक मेळटा. हे पुराय रीण 12 म्हयन्यांनी भरल्यार रीण घेवपाची मर्यादा 30 हजारा मेरेन पावता आनी तें भरले उपरांत ही मर्यादा 50 हजार मेरेन पावता.
हे येवजणे खाला 10 हजार मेरेनच्या रिणां खातीर 1746 अर्ज आयल्यात तांतूतल्या 1606 अर्जांक मान्यताय मेळून 1568 लाभार्थ्यांक रीण फावो जालां. हे येवजणे खातीर 1.61 कोटी मंजुर केल्यात आनी 1.56 कोटी इतलो नीधी खर्च केला 1302 जाणांनी आपले रीण फारीक केलां. ह्या रिणाचो कार्यकाळ एक वर्सांचो आसा.
जाल्यार दुसऱ्या पांवड्यार 30 हजार मेरेन रीण घेवपा खातीर 974 जाणांनी अर्ज केला तांतूतल्या 833 अर्जांक मान्यताय मेळून 804 लाभार्थ्यांक रीण फावो जालां. हे येवजणे खातीर 1.66 कोटी मंजुर केल्यात आनी 1.61 कोटी इतलो नीधी खर्च केला. 474 जाणांनी आपले रीण फारीक केला. ह्या रीणाचो कार्यकाळ दोन वर्सांचो आसा.
तिसऱ्या पांवड्यार 50 हजार मेरेन रीण घेवपा खातीर 422 जाणांनी अर्ज केलां. तांतूल्या 351 अर्जांक मान्यताय मेळून 331 लाभार्थ्यांक रीण फावो जालां. हे येवजणे खातीर 1.76 कोटी मंजुर केल्यात आनी 1.66 कोटी इतलो निधी खर्च केलां. फकत एकल्यानच आपले रीण फारीक केला. ह्या रीणाचो कार्यकाळ तीन वर्सांचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
