भांगरभूंय | प्रतिनिधी
पणजी : राज्यांतल्या खाजगी कंपनींनी नोकर भरती खातीर जायरात दिवंक ना जाल्यार वा हाची म्हायती रोजगार विनिमय केंद्राक दिना जाल्यार ५ ते ३० हजार रुपया दंड दितले. हे विशींच्या कायदो दुरुस्तीक बिरेस्तारा मंत्रिमंडळान मान्यताय दिली. मंत्रिमंडळ बसके उपरांत जाल्ले पत्रकार परिशदेंत मुख्यमंत्री डॉ. प्रमोद सावंत उलयताले. कंपनींतल्या कर्मचार्यांच्या आंकड्या प्रमाण हो दंड दितले अशें तांणी स्पश्ट केलें.
तांणी सांगलें, खाजगी कंपनींनी गोंयांत नोकर भरती केल्यार ताची जायरात थळाव्या दिसाळ्यांनी दिवची पडटली. तशेंच तांकां रोजगार विनिमय केंद्राक भरतीची म्हायती दिवपूय गरजेचें केलां. खाजगी कंपनीनी चडांत चड नोकर्यो थळाव्यांक मेळच्यो हे खातीर आमी यत्न करतात. हाका लागून रोजगार खात्या वतीन बेगनूच एक प्रणाली विकसीत करतले. तशेंच रोजगार निरीक्षकांकूय त्या- त्या वेळार खाजगी कंपनींच्या भरतीचेर लक्ष दवरपाची सुचवणी दिल्या.
मंत्रिमंडळान पशुसंवर्धन खात्यांत सहाय्यक पशुसंवर्धन अधिकार्यांच्यो २४ सुवातो कंत्राटी पद्धतीन भरपाक मान्यताय दिल्या. एक्स्पोझिशना खातीर आयिल्ले ५ कोटी खर्च पोस्ट फेक्टो पद्धतीन मंजूर केले. तशेंच कोवीड काळांत उत्तर गोंय जिल्लोधिकारी कार्यालयाक आयिल्ले १५.२३ लाख रुपयांच्या खर्चाक मान्यताय दिली. तपोभूमीच्या सद्गुरू फावंडेशनाक गोवा स्पिरिच्युअल फेस्टिवल आयोजीत करपाक १.५ कोटी रुपयांची मान्यताय दिल्या. ही कार्यावळ कला आनी संस्कृती खात्या वतीन आयोजीत करतले.
पशुसंवर्धन खात्याक पशुखाद्य महाराष्ट्रांतल्या सहकारी संस्थे वतीन हाडपा खातीर मंत्रिमंडळान मान्यताय दिल्या. पणजेच्या रुआ दे ओरेच्या कन्व्हेन्शन सेंटर तशेंच फायव्ह स्टार हॉटेलच्या कंत्राटा विशीं वित्त खात्यान कांय सुचवण्यो केल्ल्यो हे प्रमाण दर वर्सा अतिरिक्त ५ टक्के रक्कम वाडोवपाचे सुचवणेक मंजुरी दिली. तशेंच गोंय पर्यटन विकास महामंडळान केल्ल्या युवा पर्यटन क्लब हे कार्यावळीच्या तशेंच बिमा सखी कार्यावळीच्या खर्चाकूय एक्स फॅक्टो पद्धतीन मान्यताय दिल्ल्याचें मुख्यमंत्र्यांनी सांगलें.
म्हापशें अर्बनाच्या ठेवीदारांचे पयशे परत मेळटले
मुख्यमंत्र्यांनी सांगलें, मंत्रिमंडळान म्हापशें अर्बन बँकेची नंदादीप इमारत २५ कोटी रुपयांक विकत घेवपाच्या निर्णयाक मान्यताय दिली. हे सुवातेर सरकार नवी इमारत बांदतले. हातुंतल्यान आयिल्ले पयशे ठेवीदारांक परत दिवपा खातीर वापरतले.
खाप्रेश्वराचें व्हडलें देवूळ बांदतले
श्री देव खाप्रेश्वराचें देवूळ हेर सुवातेर बांदतले हाची कल्पना दिल्ली. आदले समितीन निमाणे मेरेन सुवात सुचोवंक ना. आतां नवी समिती प्रसाद घेवन सुवात थारायतली. उपरांत दोन दिसांनी देवळाचें बांदकाम सुरू जातलें. नवे सुवातेर व्हडलें देवूळ बांदतले. हांगा वडाचें नवें झाड लायतले अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
