भांगरभूंय | प्रतिनिधी
मडगांवः मडगांव पालिका इमारती फाटल्यान आशिल्ल्या पार्किंग प्रकल्प वाठारांत पालिका प्रशासना कडल्यान कोयर सांठोवन दवरतात. थंय कोयराच्या राशीक उजो लागलो. मडगांव उजो पालोवपी दळान उजो नियंत्रणांत हाडलो. कोयराक उजो लायिल्लो आसूं येता असो अदमास हड आशिल्ल्यांनी उक्तायलां.
मडगांव पालिका इमारती फाटल्यान पार्किंग प्रकल्प उबारपाच्या वाठारांत मडगांव पालिकेचे कामगार कोयर सांठोवन दवरतात. थंय कोयर हाडून उजोवन त्या वाठारांत वर्गीकरणाचे काम जाता अशी म्हायती मेळ्ळ्या. सकाळीं 8:30 वरांचेर हो उजो लागलो. पूण थंय काम करपी कामगारांनी हे विशीं कोणाकूच कळयलें ना आनी उजोय पालोवंक ना. कामगारांनीच हो उजो लायिल्लो आसूं येता असो अदमास थळाव्या लोकांनी उक्तायलां. पालिका वाठारांत लेगीत कोयर एकठांय करून उजो लावपाच्यो घडणुको घडतात अशें सांगलें. उजो लागिल्ल्याची म्हायती मेळ्ळे बरोबर मडगांव उजो पालोवपी दळान उजो पालयलो.
कोयराक उजो लागपाच्यो घडणुको घडत आशिल्ल्यान कोयर वेवस्थापन करपाची गरज आसा अशें राजेंद्र आजगांवकार हांणी सांगलें. मडगांवांत साबार सुवातींनी कोयराच्यो राशी दिसतात. देखून उजो लागलो जाल्यार व्हड दुर्घटना जावंक शकता. पालिका प्रशासनान हाचेर लक्ष दिवपाची गरज आसा अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
