भांगरभूंय | प्रतिनिधी
पेडणें: हरमल दर्यादेग वाठारांत व्हडा प्रमाणांत बेकायदेशीर सीआरझेड नेम मोडून केल्ली बांदकामां मोडपाक सध्या सुरवात केल्या. २१६ बांधकामां मदलीं णव बांदकामां मोडल्यांत.
फाटल्या वर्सा सावन हरमल दर्यादेग वाठारांत गिरकर वाड्यावेल्या बेकायदेशीर बांधकामा विशीं हीं प्रकरणां न्यायालयांत पाविल्लीं. तेन्ना सरपंच म्हणून बर्नाड फर्नांडीस हे आसतना ह्या बांधकामां विशीं उच्च न्यायालयान गंभीर दखल घेवन सरपंचाच्या सोयर्यां सयत हेर खंयचीं बांदकामां बेकायदेशीरपणान उबारल्यांत, त्या सगल्यांचेर कारवाय करपाचे आदेश दिल्ले. ते प्रमाण वट्ट २१६ बांधकामांचेर कारवाय करपाचे संकेत मेळ्ळे उपरांत पेडणें मामलेदार पेडणें गट विकास कार्यालया वरवीं बांधकामां मोडपाचें काम सुरू जालें.
हनुमान उपसरपंच सोनाली माज्जी हांचे कडेन संपर्क केलो तेन्ना, काल सावन उच्च न्यायालयाच्या आदेशा प्रमाण बांधकाम मोडपाक सुरुवात केल्ली. काल आनी आयज मेळून णव बांदकामां मोडिल्ल्याचें तांणी सांगलें. हरमल गिरकर वाड्यावेल्या दर्यादेग वाठारांत बेकायदेशीर उबारिल्ल्या बांधकामांचेर चार आनी पांच ह्या दोन दिसांनी वट्ट णव बांधकामांचेर कारवाय केली.
सी आर झेड विभागाचे नेम मोडीत व्हडा प्रमाणांत बेकायदेशीर बांधकामां मांद्रें मतदार संघांतल्या दर्यादेग वाठारांत केल्लीं. हे विशीं विभागा कडेन कागाळ केले उपरांत हाची दखल न्यायालयान घेवन हीं बांधकामां मोडपाचो आदेश दिल्लो. पर्यटन हंगामांत ह्या बांधकामांचेर कारवाय जाल्ल्यान वेवसायीकांक व्हडा प्रमाणांत लुकसाण सोंसचें पडिल्लें.
हरमल, केरी, तेरेखोल, मांद्रें, मोरजी ह्या दर्यादेग वाठारांत व्हडा प्रमाणांत बिगर गोंयकारांनी जमनी भाड्याक घेवन व्हडा बांदकामां करतना, ह्या बांदकामांक थळावी पंचायती वा सीआर झेड विभागाचो परवानो नासतना व्हड बांदकामां करतात. हाचे कडेन सरकाराचें तशेंच थळावे पंचायतीची आडनदर जाता अशें दिसून येता. फाटल्या वर्सा न्यायालयान सुमोटो याचिका स्वता दखल करून कांय बांदकामां मोडपाचे आदेश दिल्ले. तांतलीं कांय बांदकामां हरमल वाठारांतलीं मोडलीं. तांतलीं कांय बांदकामां ४ आनी ५ तारखेक मोडलीं. मात हेर व्हडा प्रमाणांत बिगर गोंयकारांनी सीआरझेड विभागाचे नेम मोडून केल्लीं बांधकामां आयज मेरेन तेच सुवातेर आसात. ताचेर कोण कारवाय करतलो? असो प्रस्न नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
