जपानांत सेगीत णवव्या वर्सा जल्माचें प्रमाण उणें

भांगरभूंय | प्रतिनिधी

टोकियो, खबरां संस्था ः जपानांत सेगीत णवव्या वर्सा जल्माचें प्रमाण उणें जालां. हाका लागून देशाच्या अस्तित्वाक आनी अर्थवेवस्थेक व्हड धोको निर्माण जाता. भलायकी मंत्रालयाच्या म्हणण्या प्रमाण, 2024 वर्सा जपानांत फकत 7 लाख 20 हजार 988 भुरगीं जल्माक आयल्यात. 2023 वर्सा परस हें 5% उणें आसा. हो आंकडो 125 वर्सांतलो सगळ्यांत उणो आसा. दुसरे वटेन मरण येवपाचें प्रमाण विक्रमी पांवड्यार पावलां. 2024 वर्सा जपानांत 16 लाख लोकांक मरण आयलें. म्हणल्यार जल्मल्ल्या दर एका भुरग्या फाटल्यान दोन मनीस मरत आसात. जपानांत जल्माचें प्रमाण उणें जावप आनी जाण्टी लोकसंख्या नेटान वाडत आशिल्ल्यान ताचे अर्थीक स्थिती आनी राश्ट्रीय सुरक्षेक व्हड आव्हान आसा.
जपानांत 30% लोकसंख्या 65 वर्सां पिराये वयली आसा. तज्ञांच्या म्हणण्या प्रमाण जल्म प्रमाण उणें जावपाचें एक मुखेल कारण म्हणल्यार कोविडाक लागून लग्नांत जाल्लो उणाव. पूण फाटल्या वर्सा लग्नांचे प्रमाण 2.2 टक्क्यांनी देंवून वट्ट 4 लाख 99 हजार 999 लग्नांचेर पावलें. पूण ही वाड लेगीत पयलीं जाल्ल्या उणावाची भरपाय करपाक शकना.
दक्षीण कोरियांत जल्म प्रमाण उणें जाल्ल्याचो परिणाम शिक्षण वेवस्थेचेर जाणवता. शिक्षण मंत्रालयाच्या म्हणण्या प्रमाण, 2025 वर्सा 49 शाळा कायमच्यो बंद जातल्यो. कारण विद्यार्थ्यांचो आंकडो उणो जायत आसा. तातूंत 38 मुळाव्यो शाळा, 8 माध्यमीक शाळा, आनी 3 उच्च माध्यमीक शाळा आसात. बंद जावपी 88 टक्के शाळा गांवगिऱ्या वाठारांनी आसात. फाटल्या कांय वर्सांत शाळा बंद करपाचो आंकडो स्थिरपणान वाडत आसा. 2023 वर्सा 22 शाळा बंद जाल्यो, जाल्यार 2024 वर्सा हो आंकडो वाडून 33 जाल्लो जाल्यार 2025 वर्सा 49 शाळा बंद जावपाचे वाटेर आसात.