भांगरभूंय | प्रतिनिधी
मनीसपणाचे नदरेन जमीन धनयान दिलो 15 दिसांचो वेळ
फोंडेंः शापूर-बांदोडें पंचायतींतल्या 11 व्या प्रभागांत आशिल्ल्यो 31 झोंपड्या न्यायालयान मोडपाचो आदेश दिलो. वकील आनी जेसीबी हांचे वांगडा काल (मंगळारा) सकाळीं झोंपडपट्टी मोडपा खातीर जमनीच्या धनयान झोंपडपट्टी वाठारा कडेन आयले उपरांत झोंपडपट्टींत रावपी आनी तांच्या भुरग्यां मदीं भंय पातळ्ळो.
हाचे उपरांत बांदोडेंचे सरपंच रामचंद्र नायक आनी आदले पंच वांगडी राजेश नायक धांवून जमनीच्या धनया कडेन मनीसपणाचे नदरेन एक म्हयन्याचो वेळ दिवचो अशी मागणी केली. जाका लागून झोंपडपट्टी लोकांक पर्यायी वेवस्था करपाक मेळटली. उपरांत जमनीच्या धनयान आनी तांच्या वकिलान झोंपडपट्टींतल्या लोकांक आपल्यो झोंपड्यो काडपाक 15 दिसांचो वेळ दिलो.
न्यायालयाच्या आदेशा उपरांत मुल्ला कुटुंबान 31 झोंपड्यो मोडपाचो निर्णय घेतला अशें बांदोडेंचे सरपंच रामचंद्र नायक हांणी सांगलें. पूण पंचायतीन तांकां मनीसपणाचे नदरेन थोडो वेळ दिवपाची विनंती केल्या. ते खातीर तीं झोंपडीपट्टी निवळ करपाक 15 दिसांचो वेळ दिला.
आदले पंच वांगडी राजेश नायक हांणी सांगलें, भुरगेपणा सावन झोंपडपट्टींत रावपी लोकांक हांवें पळयलां. पूण जमनीचे धनी मुल्ला कुटुंबान न्यायालयांत याचिका दाखल केल्ली आनी तातूंत मोडपाचो आदेश दिल्लो. रमजान उत्सव आशिल्ल्यान झोंपडपट्टी रोखडीच मोडची न्हय अशी विनंती मनीसपणाचे नदरेन केल्या आनी धनयान झोंपड्यो काडपाक 15 दिसांचो वेळ दिला अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
