भांगरभूंय | प्रतिनिधी
मुंबय, खबरां संस्था: महाराष्ट्राचे अन्न आनी नागरी पुरवण मंत्री धनंजय मुंडे हांणी आयज निमाणो राजिनामो दिलो. मुख्यमंत्री देवेंद्र फडणवीस हांणी तो रोखडोच स्विकारलो. मुंडे हे भाजपाचे ज्येश्ठ फुडारी सर्गेस्त गोपिनाथ मुंडे हांचे पुतणये. ते उपरांत राष्ट्रवादींत गेल्ले. सध्या महाराष्ट्रांत राष्ट्रवादी आनी भाजपाची युती आसा.
बीडांतल्या मस्साजोग गांवाचे सरपंच संतोष देशमुख खून प्रकरणांत धनंजय मुंडे हांचो सामको लागींचो मुखेल वावुरपी वाल्मिक कराड हाचेर खंडणीचो आरोप आसा. ह्याच प्रकरणांतल्यान संतोष देशमुख हांचो खून जाल्लो. कराड आनी खुन केल्ल्याचो दुबाव आशिल्ल्या सगल्यांत डिसेंबरांत अटक केल्ली. उपरांत सगलें शांत जाल्लें.
मात काल दनपरां संतोष देशमुख हांच्या खुनाचे फोटो मुखार आयले उपरांत पुराय महाराष्ट्रांत तिडकीचें ल्हार आयलें. ताका लागून धनंजय मुंडे हांकां राजीनामो दिवचो पडलो. सकाळीं मुख्यमंत्री फडणवीस हांणी तांकां राजिनामो दिवपाक सांगिल्लें. दोन दिसां पयलीं सोमारा मुंडे राजिनामो दितले असो गौप्यस्फोट तांची आदली घरकान्न करुणा शर्मा हांणी केल्लो. धनंजय मुंडे हांचे सहाय्यक प्रशांत भामरे आनी प्रशांत जोशी हे दोगूय मुंडे हांचो राजिनामो घेवन मुख्यमंत्री फडणवीस हांच्या सागर बंगल्यार सकाळीं दाखल जाल्ले.
९ डिसेंबर २०२४ दिसा मस्साजोगचे सरपंच देशमुख हांचो खून जालो. आवादा कंपनी कडेन खंडणी मागपाक गेल्ल्या एकल्याच्या कानफटार मारिल्ल्यान उपरांत हो खून जाल्लो. मुंडे हांचो ‘रायट हँड’ अशी नामना आशिल्लो वाल्मिक कराड ह्या खून प्रकरणाचो मुखेल सुत्रधार आशिल्ल्याचे आरोप जाल्ले. सुरवातेक पुलिसांनी गुन्यांव नोंद करून घेवपा, तपास करपाक टाळाटाळ केल्ली. निमाणें पत्रकारांनी हें प्रकरण उजवाडाक हाडटकच लोकूय खुबळ्ळे. मागीर मुख्यमंत्री फडणवीस हांणी देशमुख खून प्रकरणाच्या तपासा खातीर एसआयटी नेमपाचे आदेश दिल्ले. सीआयडी आनी एसआयटीन जोड पालवान प्रकरणाचो तपास केल्लो. हातूंत कराड आनी तांच्या वांगड्यांचो हात दिसून आयिल्लो. हाका लागून सीआयडीन सगल्यांक अटक केली. उपरांत लोकांनी परत बोवाळ करतकच ‘मकोका’ कायद्या खाला कारवाय केली.
हालींच ह्या प्रकरणांत १५०० पानांचें आरोपपत्र दाखल केलां. हातूंत वाल्मिक कराड हेच संतोष देशमुख खून प्रकरणांत मुखेल सुत्रधार आशिल्ल्याचें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
