भांगरभूंय | प्रतिनिधी
केंद्रीय गृहमंत्री अमीत शाह हांची डॉ. प्रमोद सावंत हांकां सुचोवणी
भांगरभूंय । प्रतिनिधी
पणजी : भारतीय नागरीक सुरक्षा संहिता, भारतीय न्याय संहिता आनी भारतीय साक्ष अधिनियम ह्या तीन नव्या फौजदारी कायद्यांच्या प्रभावी अंमलबजावणेचे बाबतींत गोंय एक आदर्श राज्य जातलें, हे खातीर यत्न करचे, अशी सुचोवणी केंद्रीय गृहमंत्री अमीत शाह हांणी सोमारा मुख्यमंत्री डॉ. प्रमोद सावंत हांकां केली.
सोमारा नवी दिल्लींत केंद्रीय गृहमंत्री शाह हांणी तीन नव्या फौजदारी कायद्यांच्या गोंयांतले अंमलबजावणे कडेन संबंदान मुख्यमंत्री डॉ. सावंत हांचे कडेन नियाळ बसका घेतली. बसकेंत नव्या कायद्यांतल्या पुलीस, बंदखण, न्यायालयां, फौजदारी खटले चलोवप आनी न्यायवैद्यक ह्या घटकां कडेन संबंदीत तडविजेंचे अंमलबजावणेचे नदरेन शाह हांणी डॉ. सावंत हांचे कडल्यान नियाळ घेतलो. केंद्रीय गृहसचीव, गोंयचे मुख्य सचीव, पुलीस म्हासंचालक हे अधिकारी बसकेक हाजीर आशिल्ले.
पिडेस्त व्यक्तींक बेगिनात बेगीन न्याय मेळचो, हेच तीन नव्या फौजदारी कायद्यांचें उदिश्ट आसा. ते खातीर तपास आनी खटल्यांत काळ मर्यादा खरसाणीन पाळप गरजेचें आसा. सात वर्सां परस चड ख्यास्तीची तजवीज आशिल्ल्या गुन्यांवकारी प्रकरणांनी 90 टक्के दोशसिद्धी दर मेळोवपाची गरज आसा. हे खातीर ई- गवायेचेर सगळ्या तपास अधिकाऱ्यांची नोंदणी सक्तीची करपाची गरज आसा. गोंयांत 31 मार्च 2025 मेरेन ई- समन्साची पुराय अंमलबजावणी करपाचे निर्देश लेलगीत शाह हांणी दिल्यात. मजगतीं, भारतीय न्याय संहिता, भारतीय नागरीक सुरक्षा संहिता आनी भारतीय साक्ष अधिनियम हे तीन कायदे अस्तित्वांत आयले उपरांत गोंयांत आतां मेरेन 23 तल्या 21 प्रकरणांनी दुबावीत दोशी आशिल्ल्याचें सिद्ध जाल्ल्यान फकत दोनूच प्रकरणांतल्या दुबावितांची निर्दोश सुटका जाल्या, अशें कांय दिसां आदीं गुन्यांव विभागाचे अधिक्षक राहूल गुप्ता हांणी स्पश्ट केल्लें.
जप्त केल्ली मालमत्ता तांच्या धनयांकूच दियात
संघटीत गुन्यांवकारी, आकांतवाद आनी जमावा कडल्यान जावपी हत्त्यां कडेन संबंदीत प्रकरणांचेर वरिश्ठ पुलीस अधिकार्यांनी नेमान लक्ष दवरपाक जाय. ताका लागून संबंदीत तजविजेंचो गैरवापर जावचो ना. ह्या कलमां खाला गुन्यांव नोंद करचे आदीं कायद्यांतले तजविजें प्रमाण गुन्यांवकारां कडल्यान जप्त केल्ली मालमत्ता योग्य धनयांक परतून दितले, हाची खात्री करपाचेंय निर्देश अमीत शाह हांणी मुख्यमंत्री डॉ. प्रमोद सावंत हांकां दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
