भांगरभूंय | प्रतिनिधी
मडगांव: पद्मभूषण रवीन्द्र केळेकार युवा सर्जक पुरस्कार ह्या वर्सा युगांक नायक, पुरुषोत्तम वेर्लेंकर, तन्वी कामत बांबोळकार हांकां जाहीर जाला अशी म्हायती मडगांव रवींद्र भवनाचे अध्यक्ष राजेंद्र तालक हांणी दिली.
मडगांव रवींद्र भवना वतीन पद्मभूषण केळेकार हांच्या जल्मशताब्दी वर्स सुवाळ्याचें आयोजन करतात. हे विशींची म्हायती पत्रकार परिशदेंत दिली. ह्या वेळार मडगांव रवींद्र भवनाचे अध्यक्ष राजेंद्र तालक, अनंत अग्नी, मनोहर बोरकार, प्रशांत नायक आनी हेर हाजीर आशिल्ले. पद्मभूषण केळेकार हे कोंकणी लेखक, विद्वान, भाशाशास्त्र आनी सर्जनशील विचारवंत, स्वातंत्रसैनीक आनी आधुनीक कोंकणी चळवळींतले प्रणेते आसात.
तांच्या जल्मशती निमतान रवींद्र भवन मडगांवां 15 ते 35 पिराये गटांतले पद्मभूषण रवींद्र केळेकार निबंद लेखन सर्त आयोजीत केल्ली. हातूंत 26 स्पर्धकांनी वांटो घेतिल्लो. हातूंतल्या जैतिवंतांक पयल्या तीन इनामां खातीर सात हजार, पांच हजार, तीन हजार रुपया अशी रोख रक्कम आनी प्रमाणपत्र अशी इनामां भेटयतले.
ह्या जैतिवंतांक युवा सर्जक पुरस्कार आनी सर्तीतलीं इनामां 6 मार्च दिसा भेटयतले. ह्या दिसा दिलीप बोरकार हांण निर्मीत केल्ल्या पद्मभूषण रवींद्र केळेकार हांचे वेल्या ‘जीवन योगी रवींद्र केळेकार’ म्हायतीपट 6 मार्च दिसा प्रदर्शीत करतले. गिरीश रवींद्र केळेकार हांच्या मार्गदर्शना खाला छायाचित्रां आनी पुस्तकांचें प्रदर्शन करतले.
हे कार्यावळीक आमदार दिगंबर कामत, आमदार विजय सरदेसाय हे मानाचे सोयरे म्हूण हाजीर रावतले. ज्ञानपीठ पुरस्कार जैतिवंत दामोदर मावजो हे हेर मानेस्तां सयत कार्यावळीचे अध्यक्षस्थान भुशयतले. कार्यावळी खातीर किरण बुडकुले हांकां मुखेल उलोवपी म्हूण आमंत्रीत करतले. तशेंच गिरीश रवीन्द्र केळेकार हे कार्यावळीक हाजीर रावतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
