भांगरभूंय | प्रतिनिधी
वास्को शारांत काल (सोमारा) कार्नाव्हाल व्हड उमेदीन मनयलो. फुडले आठ दीस गोंयांत किंग मोमोची राजवट आसतली. कार्नाव्हालांत वांटेकार जाल्ल्या नृत्य फ्लोट्साक (चित्ररथ) लागून हाजीर आशिल्ल्यांक विवीध मनरिजवणेचो आस्वाद घेवंक मेळ्ळो. कार्नाव्हाल हो गोंयच्या सांस्कृतीक पर्यटनाचो एक वांटो आसा अशें उलोवप येरादारी मंत्री मॉवीन गुदिन्हो हांणी केलें.
गोंयांत कार्नाव्हाल शेनवारा राजधीन पणजेंत सुरू जाल्लो. काल वास्को कार्नाव्हालांत येरादारी मंत्री मॉवीन गुदिन्हो आनी वास्कोचे आमदार कृष्णा साळकार हाणी हाजेरी लायली. किंग मोमो सयत चित्ररथांक पाचवो बावटो दाखयले उपरांत किंग मोमो क्लीफ फर्नांडीस हांणी कार्नाव्हाल सुरू जाल्ल्याची घोशणा केली. ह्या वेळार कार्नाव्हालांत विवीध चित्ररथांनी लोकांची मनां जिखलीं. ह्या चित्ररथां मदीं गोयची संस्कृती, वारसो आनी परंपरीक वेवसायांचें दर्शन घडलें.
पर्यटन खात्याच्या पालवान वास्को पालिके वतीन वास्कोंत कार्नाव्हाल चित्ररथ मिरवणूक सेंट अँन्ड्रूय चर्च ते जोशी चौक ह्या पंरपरीक मार्गा वेल्यान काडली. कार्नाव्हाल मिरवणुके खातीर रस्त्याच्या दोनूय वटांनी नागरिकांनी चित्ररथ पळोवपा खातीर गर्दी केल्ली. ह्या वर्सा वास्कोंतल्या कार्नाव्हाल मिरवणुकेंत नौदळाच्या चित्ररथाचो आस्पाव आशिल्लो. भलायकी खात्या वतीन अवयदानाचें म्हत्व पटोवन दिवपी चित्ररथ आशिल्लो. तशेंच मिशन रेबीज हाची म्हायती दिवपी जाल्यार गोंय पुलिसांचो रस्तो सुरक्षा नेमांक पाळो दिवपा विशींचो चित्ररथ आशिल्लो. क्षय दुयेंसा विशीं जागृताय करपी चित्ररथ लेगीत मिरवणुकेंत आशिल्लो. तशेंच पर्यावरण वाटावपाचो संदेश दिवपी, नुस्तें वेवसाय, कांसवाचें संवर्धन हांचे सयत आकर्शक चित्र प्रतिकृतींचें आकर्शण आशिल्लें.
वास्कोतली कार्नाव्हाल मिरवणूक सोमारा आशिल्ल्यान वाहनांची गर्दी चड नाशिल्ली. पूण कार्नाव्हाला खातीर येवपी लोकांचे सोयी खातीर व्हण प्रमाणांत पुलीस बंदोबस्त दवरिल्लो. कार्नाव्हाल चित्ररथ मिरवणुकेंत वांटेकार जाल्ल्या कलाकारांक त्रास जावचो न्हय हाची जतनाय पुलीस घेताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
